डिचोलीत मजुरांची संख्या झाली कमी; मात्र समस्या कायम

शहरातील बसस्थानकाजवळील मजुरांची संख्या कमी झाली असली, तरी समस्या मात्र कायम आहे. शहरातील पर्यायी बसथांब्यावरील संभाव्य धोका टाळण्यासाठी बसस्थानकाबाहेर रस्त्यावर गर्दी करणाऱ्या मजुरां विरोधात गेल्या 29 एप्रिल रोजी पोलिसांनी मोहीम हाती घेतली होती. (The number of laborers in Bicholim decreased But the problem persists)

पोलिसांनी बसस्थानकाजवळ उभ्या राहणाऱ्या मजुरांना हुसकावून लावताना मजुरांची धरपकडही केली होती. त्यानंतर पोलिस कारवाईच्या भीतीने तीन-चार दिवस मजुरांनी बसस्थानकाबाहेर उभे राहण्याचे टाळले होते. मात्र हळूहळू काही मजुरांनी बसस्थानक परिसरात आपला मोर्चा वळविला आहे. बसस्थानकासमोरील 'माणिक बार आणि रेस्टॉरंट'समोर पुन्हा मजुरांची गर्दी दिसून येत आहे.

सध्याचा पर्यायी बसथांबा भर रस्त्याला टेकून करण्यात आला आहे. मजुरांच्या गर्दीमुळे प्रवासी बसगाड्या आतबाहेर घेताना एखादेवेळी मोठा अनर्थ घडण्याची भीती आहे. त्यामुळे या मजुरांना तेथून कायमचे हुसकावून लावावे. अशी मागणी जागृत नागरिकांकडून करण्यात येत आहे.

मजुरांचे स्थलांतर

दरम्यान, आठ दिवसांपूर्वी पोलिसांनी कारवाई केल्यानंतर काही मजुरांनी स्वतःहून स्थलांतर केले आहे. तरीदेखील त्याचा विशेष फरक जाणवत नाही. सध्या हे मजूर बसस्थानकाच्या मागच्या बाजूने 'लोकमान्य'समोरील रस्त्यावर मजुरीच्या प्रतीक्षेत थांबलेले असतात. अधूनमधून पूर्वीच्या ठिकाणी त्यांचा वावर दिसून येत आहे.