Goa Comunidade: शेडचे बांधकाम पुढील निर्णयापर्यंत राहणार बंद

Goa Comunidade: रामतळे येथे उभारल्या जाणाऱ्या एमआरएफ (मटेरियल रिकव्हरी फॅसिलीटी) शेडचे बांधकाम थांबविण्याचे निर्देश उत्तर गोवा कोमुनिदाद प्रशासकांनी मध्यंतरी दिले होते. त्यानुसार, आज मंगळवारी प्रशासकांनी सुनावणीवेळी पुढील निर्णयापर्यंत शेडचे बांधकाम बंदच ठेवण्याचा आदेश यापुढे लागू राहील, असे स्पष्ट केले.

येत्या ४ जानेवारीपर्यंत ही सुनावणी तहकूब करण्यात आली आहे. हळदोणा पंचायतीकडून सर्व्हे क्र. ३४३/१६मध्ये एमआरएफ शेड उभारणीचे काम हाती घेण्यात आलेले. मात्र, या कामास रामतळे तसेच साईनगरमधील ग्रामस्थ आणि रामतळेश्वर देवस्थानने आक्षेप घेत यास जोरदार विरोध केला आहे. त्यानुसार, रामतळे रहिवाशांनी उत्तर गोवा कोमुनिदाद प्रशासकांकडे लेखी तक्रार दिल्यानंतर, प्रशासकांनी २७ डिसेंबर २०२३ रोजी, शेडचे बांधकाम तत्काळ थांबविण्याचे निर्देश दिले होते आणि २ जानेवारीला आपल्या कार्यालयात दोन्ही उभय पक्षास सुनावणीसाठी हजर राहण्यास सांगितले होते.

या निर्देशानुसार मंगळवारी (ता.२) दुपारी उत्तर गोवा कोमुनिदाद प्रशासक सागर गावडे यांच्यासमोर सुनावणीदरम्यान, दोन्ही पक्षांनी युक्तिवाद करीत आपापले दावे-प्रतिदावे सादर केले. याविषयी माहिती देताना रामतळेश्वर देवस्थानचे प्रतिनिधित्व करणारे वकील अ‍ॅड. विनायक परब म्हणाले, कोमुनिदाद प्रशासकांसमोर सुनावणीदरम्यान आम्ही आणि आमच्या विरोधी पक्षाने आपली बाजू मांडली.

यावेळी आम्ही या एमआरएफ शेडमुळे देवस्थान व तेथील तळीचे होणारे प्रदूषण तसेच दुष्परिणामांविषयी प्रशासकांना माहिती दिली.

त्यानंतर दोन्ही बाजूंचे म्हणणे ऐकत प्रशासकांनी पुढील निर्णयापर्यंत वरील शेडचे बांधकाम बंदच ठेवण्याचा आदेश यापुढे लागू राहील असे सांगितले आहे.

उद्या पुन्हा सुनावणी

याप्रकरणी पुढील सुनावणी येत्या ४ जानेवारी सायंकाळी ४.४५वा. होईल. त्यादिवशी दोन्ही पक्षांना आपाले म्हणणे सादर करून गुणवत्तेवर युक्तिवाद करावे लागतील. त्यानंतर प्रशासक या प्रकरणी पुढील निर्णय देणार असल्याची माहिती परब यांनी दिली.