Heat Wave : राज्यात उष्मा वाढला, घामोळ्याने जीव होतोय हैराण; काळजी घेण्याचे आवाहन

Heat Wave :

पणजी, राज्यात वाढत्या तापमानामुळे उष्म्याच्या आजारातही वाढ झाली आहे. वाढत्या उष्म्यामुळे सातत्याने लागणाऱ्या घामाच्या धारांमुळे घामोळे येणे, चक्कर येणे, अशक्तपणा आदी प्रकार वाढत आहेत.

काळजी घेण्याचे आवाहन :

नागरिकांनी याबाबत योग्य ती काळजी घेणे जरुरीचे आहे. मागील आठवड्यात पडलेल्या अवकाळी पावसानंतर पुन्हा उष्मा तसेच मोठ्या प्रमाणात वाढलेल्या आर्द्रतेमुळे नागरिकांना खासकरून कामगारवर्ग, ज्येष्ठ नागरिक तसेच छोट्या मुलांना त्रास होत आहे. लहान मुले, ज्येष्ठ नागरिकांना घामोळे येणे आदी प्रकार वाढलेले असून घामोळ्यापासून सुटका मिळावा, तसेच काही प्रमाणात गारवा मिळावा यासाठी अनेक नागरिक समुद्रात खाऱ्या पाण्याच्या स्नानासाठी देखील जात आहेत.

वाढत्या उष्म्याच्या आजारांसंबंधी आरोग्य संचालनालयाचे नोडल अधिकारी डॉ. प्रशांत सूर्यवंशी यांना विचारले असता वाढत्या उष्म्यामुळे हीट रॅश, हीट एडिमा असे प्रकार घडून येतात. उष्म्यामुळे घामोळे येणे हे प्रकार साहजिकच आहे. वाढत्या उष्म्याचा त्रास प्रामुख्याने लहान मुले, ज्येष्ठ नागरिक आणि खास करून कामगार वर्गाला होत असतो. आता शाळांना सुटी असल्याने मुलांना तसा त्रास नाही. ज्येष्ठ नागरिक जर दुपारी उन्हात आल्यास त्यांना त्रास होऊ शकतो, त्यामुळे त्यांनी काळजी घेणे गरजेचे आहे, असे ते म्हणाले.

तापमानाचा पारा ३४.२ अंशांवर

राज्यात तापमानाचा आलेख चढता असून दिवसेंदिवस वाढलेले तापमान आणि आर्द्रतेमुळे राज्यातील नागरिकांना मोठ्या प्रमाणात उष्म्याला सामोरे जावे लागत आहे. आज राज्यात कमाल ३४.२ अंश सेल्सिअस एवढ्या तापमानाची नोंद करण्यात आली. जे सर्वसामान्य तापमानाच्या तुलनतेत काही अंशी अधिक आहे.

राज्यात मागील दोन दिवसांच्या तुलनेत आज उष्मा कमी होता. आज राज्यात कमाल ८४ टक्के एवढ्या आर्द्रतेची नोंद करण्यात आली. मागील दोन दिवस राज्यातील कमाल आर्द्रता ९० टक्क्याहून अधिक होती. पुढील चार दिवस राज्यातील काही भागात आर्द्रतेमुळे अधिक उष्मा जाणविण्याची शक्यता गोवा वेधशाळेद्वारे वर्तविण्यात आली आहे. आज पणजी येथे कमाल ३४.२ अंश सेल्सिअस तर किमान २५.२ अंश सेल्सिअस तापमानाची नोंद करण्यात आली.

कामगारांना आवाहन ः

कामगार वर्ग उन्हात काम करत असतात, त्यामुळे त्यांना त्रास होऊ शकतो. कामगार आयुक्तांना यासंबंधी योग्य त्या उपाय योजना करण्यास सांगितले आहे. शक्यतो दु. १२ ते ३ या दरम्यान लहान-सहान कामे करावी किंवा काम बंद ठेवावे.

सकाळी लवकर कामे सुरू करावीत अशा सूचना करण्यात आल्या आहेत. वाढत्या उष्म्याच्या अनुषंगाने योग्य ती पावले उचलण्यात आल्याचे डॉ. सूर्यवंशी यांनी सांगितले.