FDA Raid At Mapusa: म्हापसामध्ये अन्न आणि औषध प्रशानसनाची मोठी कारवाई; 500 किलो पनीर जप्त

गोव्यात मागील काही दिवसांपासून अन्न आणि औषध प्रशानसनाकडून धडक मोहीम राबवण्यात येत आहे. यातच आता, अन्न आणि औषध प्रशासनाने मोठी कारवाई केली आहे. काही दिवसांपूर्वीच म्हापसा बसस्थानकावरुन मोठा मुद्देमाल जप्त करण्यात आला होता.

यातच पुन्हा एकदा औषध प्रशासनाने धडक कारवाई केली. प्रशासनाने म्हापसा बस स्थानकावरुन तब्बल दिड लाखांचे 500 किलो पनीर जप्त केले. महाराष्ट्र आणि कर्नाटक येथून येणाऱ्या खाजगी वाहनावर ही कारवाई करण्यात आली.

दरम्यान, म्हापसा (Mapusa) नवीन बसस्थानकावर अन्न आणि औषध प्रशासनाच्या अधिकाऱ्यांनी काही दिवसांपूर्वी मोठी छापेमारी केली होती. मुंबईतून गोव्यात येणारे फ्रोजन फूड, मावा, मसाले यासारखे खाद्यपदार्थ या छापेमारीत जप्त केले होते. आता, रिचर्ड नोरोन्हा यांच्या नेतृत्वाखालील FDA अधिकाऱ्यांनी खाजगी वाहनांची अचानक तपासणी केली, ज्यामध्ये दीड लाखांचे पनीर जप्त करण्यात आले.

तसेच, म्हापसा, हणजुणे, कोलवाळ येथे बेकायदेशीररित्या तंबाखूजन्य पदार्थांची विक्री करणाऱ्या दुकानांवर म्हापसा पोलिसांनी कारवाई केली होती. दुकानमालक आणि विक्रेत्यांविरोधात ही कारवाई करण्यात आली होती.