मंत्री बाबूश मोन्सेरात यांचे नाव घेत आल्तिनोवरील झोपडपट्टीवासीयांची सध्या दादागिरी वाढली आहे. आलिशान घरांचे स्वप्न पाहणाऱ्या या झोपडपट्टीवासीयांची आता पक्की घरे झाली.
त्यात एअर कंडिशनरचा वापर होऊ लागला. या वस्तीकडे जाणाऱ्या मार्गावर सरकारी वसाहतीतील वाहनांना मज्जाव आहे.
पणजीतील ‘व्होट बँक’ सांभाळण्याच्या नादात या झोपडपट्टीवासीयांनी आता बस्तान पक्के केले आहे. मिळालेल्या माहितीनुसार, येथील सरकारी जागा एका नागरिकाने राजकीय वरदहस्तामुळे आपल्या नावे केल्याची चर्चा जोरात आहे.
महापालिकेतील नगरसेवकांना पाडण्याची आणि निवडून आणण्याची ताकद या झोपडपट्टीवासीयांमध्ये असल्याचे सांगितले जाते.
कार्यालयात हेलपाटे
सरकारी वसाहतीतून या झोपडपट्टीत जाण्याचा मार्ग आमदार मोन्सेरात यांनी करून दिल्याने तो आमच्यासाठी खास असल्याचे येथील नागरिकांचे म्हणणे आहे. येथील एका नागरिकाने ही राहती सरकारी जागा आपल्या नावे केल्याची दबक्या आवाजात चर्चा आहे.
त्यामुळे आता आजूबाजूचे लोकही आपल्या नावे जागा होणार, या आशेने आमदारांच्या मिरामार कार्यालयात हेलपाटे मारत आहेत.
महापालिका शांतच! : महापालिकेला ही वसाहत झाल्यापासून काहीच करता आले नाही; कारण महापालिकेत मोन्सेरात यांची सत्ता राहिली आहे. मतांसाठी ही वसाहत महत्त्वाची आहे.
याठिकाणी मोन्सेरात यांच्या मर्जीतील नगरसेवक डोळे झाकून निवडून येऊ शकतो, तो अशा मतांमुळेच. आता या लोकांची पक्की घरे झाली आहेत, त्यामुळे त्यांना हटविण्याचे धाडस महापालिका करण्याची शक्यता कमीच आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.