Goa ST Reservation: गोव्यात एसटी आरक्षणावरून तणाव; मडकईकर म्‍हणतात, बहिष्काराचा निर्णय नव्‍हताच!

Goa ST Reservation: अनुसूचित जमातीसाठी (एसटी) राजकीय आरक्षण मिळावे, यासाठी प्रयत्न जरूर सुरू आहेत. दक्षिण गोव्यात झालेल्या संघटनेच्या सभेत लोकसभेच्या 2024च्या निवडणुकीवर बहिष्कार टाकण्याचा केवळ प्रस्ताव होता; कोणताच निर्णय झालेला नव्हता, असा दावा भाजपच्या एसटी मोर्चाचे उपाध्यक्ष धाकू मडकईकर यांनी आज केला.

तर बहिष्कार घालण्याचा ठराव एकमुखी घेण्‍यात आला होता, मडकईकर खोटे बोलत आहेत, असा आरोप ‘मिशन पॉलिटिकल रिझर्व्हेशन’चे अध्यक्ष ॲड. जुआव फर्नांडिस यांनी केला आहे.

काही दिवसांपूर्वीच दक्षिण गोव्‍यात झालेल्‍या सभेत ‘एसटी’ना राजकीय आरक्षण न मिळाल्‍यास लोकसभा निवडणुकीवर बहिष्‍कार टाकण्‍यात येईल, असा इशारा देण्‍यात आला होता. मात्र, शहा यांच्‍या सभेत मुख्‍यमंत्र्यांनी 2027 पूर्वी एसटी आरक्षण मार्गी लागेल, असा पुनरुच्‍चार केला. त्‍यानंतर आज भाजप एसटी मोर्चाचे उपाध्यक्ष धाकू मडकईकर यांनी पत्रकार परिषद घेत अप्रत्‍यक्षरीत्‍या ‘मिशन पॉलिटिकल रिझर्व्हेशन’शी फारकत घेण्‍याचा प्रयत्‍न केला आहे. राजकीय जाणकार ही फूट मानत आहेत. यावेळी जिल्हा पंचायत सदस्य सुरेश केपेकर देखील उपस्थित होते.

मडकईकर म्हणाले, 2027च्‍या विधानसभा निवडणुकीत चार जागांवर एसटींना आरक्षण मिळावे, यासाठी अनेक दिवसांपासून प्रयत्न सुरू आहेत. मुख्यमंत्री डॉ. प्रमोद सावंत याकामी प्रयत्नशील असल्याने लोकसभा निवडणुकीवर बहिष्काराची गरज नाही.

धाकू खोटे बोलतात : ॲड. फर्नांडिस

गोव्यातील एसटी समाजाला राजकीय आरक्षण लोकसभा निवडणुकीपर्यंत न मिळाल्यास मतदानावर बहिष्कार घालण्याचा जो ठराव घेण्यात आला होता, तो एकमुखी होता आणि तो ठराव घेताना धाकू मडकईकरही उपस्‍थित होते, असा खुलासा मिशन पॉलिटिकल रिझर्व्हेशनचे अध्यक्ष ॲड. जुआव फर्नांडिस यांनी केला. ‘धाकू आता खोटे बोलत आहेत. कदाचित त्यांच्यावर पक्षाकडून दबाव आला असेल.

मात्र, हा ठराव घेतला तेव्हा ते तिथे उपस्थित होते आणि त्यांनी या ठरावाला विरोध केला नव्हता. आमच्याकडे त्याचे व्हिडिओ पुरावे आहेत’, असे ॲड. फर्नांडिस यांनी सांगितले. या बैठकीला सुरेश केपेकर हे गैरहजर होते, असा मडकईकर दावा करतात, तोही खोटा आहे. मात्र ज्यावेळी हा ठराव घेतला त्यावेळी ते सभागृहात नव्हते, असेही ते म्हणाले. भाजप पक्षाला कदाचित या आंदोलनातून स्वतःचा राजकीय फायदा करून घ्यायचा असेल. त्यासाठीच ते समाज बांधवांची दिशाभूल करत आहेत, असा आरोप ॲड. फर्नांडिस यांनी केला.