Parra Villa Theft: पर्रा येथे व्हिलामध्ये चोरी! मूळच्या कर्नाटकातील संशयिताला पोलिसांकडून अटक; मुद्देमाल जप्त

म्हापसा: पर्रा येथे व्हिलामध्ये उतरलेल्या तेलंगणामधील पर्यटकांचे सुवर्णालंकार व रोख चोरल्याप्रकरणी म्हापसा पोलिसांनी संशयितास अटक केली. पोलिसांनी या संशयिताकडून चोरीचा मुद्देमाल हस्तगत केला असून याची रक्कम ५ लाख रुपये इतकी आहे. याप्रकरणी पुंडलिक लक्ष्मण चव्हाण ऊर्फ लमाणी (२८) या मूळच्या कर्नाटकमधील (Karnataka) संशयिताच्या मुसक्या आवळल्या.

पोलिसांनी दिलेल्या माहितीनुसार, ही चोरीची घटना ३१ रोजी घडली. संशयित हा पर्रा येथील व्हिलामध्ये रात्री घुसला. याप्रकरणी रक्षित गुप्ता हे फिर्यादी आहेत. संशयिताने व्हिलाच्या खिडकीमधून प्रवेश करीत फिर्यादीच्या पत्नीच्या बॅगेमधील कानातले, रोख दहा हजार, ब्रेसलेट चोरले. त्यानंतर पोलिसांनी तपास करीत, संशयिताकडून दोन कानातले, रोख ८ हजार मिळून ५ लाख रुपयांचा मुद्देमाल जप्त केला.

पोलिस उपअधीक्षक संदेश चोडणकर यांच्या मार्गदर्शनाखाली निरीक्षक निखिल पालेकर यांच्या नेतृत्वाखाली उपनिरीक्षक विशाल कुट्टीकर, अजय धुरी, हेड कॉन्स्टेबल सुशांत चोपडेकर, कॉन्स्टेबल प्रकाश पोळेकर, अक्षय पाटील, महेंद्र मांद्रेकर, आनंद राठोड, प्रियेश पेडणेकर, राजेश कांदोळकर यांनी ही कारवाई केली.