Jharkhand: गोव्याला जाऊ दिले नाही म्हणून कॉलेज तरुणीचा आत्महत्येचा प्रयत्न, रुग्णालयात दाखल

Jharkhand News

गोव्याला जाऊ दिले नाही म्हणून महाविद्यालयात शिक्षण घेणाऱ्या तरुणीने आत्महत्येचा प्रयत्न केला. तरुणीची प्रकृती गंभीर असल्याचे समोर आले असून, उपचारासाठी तिला रुग्णालयात दाखल करण्यात आले आहे. गुमला, झारखंड येथे ही घटना घडली आहे.

मिळालेल्या माहितीनुसार, निशी कछाप असे या 20 वर्षीय विद्यार्थिनीचे नाव आहे. निशी शांती नगर येथील कार्तिक ओराव महाविद्यालयात बीएचे शिक्षण घेत आहे. निशीला तिच्या बाबांसोबत गोव्याला जायचं होते. पण, बाबांनी नकार दिल्याने तिने टोकाचे निर्णय घेतला.

निशीने अनेक गोळ्यांचे सेवन केल्याने तिची प्रकृती बिघडली, सध्या तिच्यावर खासगी रुग्णालयात उपचार सुरु आहेत.

निशी कछाप मूळची घाघरा पोलिस ठाण्याच्या हद्दीत येणाऱ्या बेला गड्डा गावची रहिवासी असल्याचे सांगण्यात येत आहे.

निशीचे वडील टोटो स्कूलमध्ये सरकारी शिक्षक असून, ते गुरुवारी गोव्याच्या दौऱ्यावर जाणार होते. निशीने वडिलांसोबत गोव्याला येण्याचा आग्रह धरला पण, वडिलांनी त्याला नकार दिला. नकार दिल्याने नाराज झालेल्या निशीने टोकाचा निर्णय घेत आत्महत्येचा प्रयत्न केला. सध्या तिची प्रकृती स्थिर असून, उपचार सुरु आहेत.