पुस्तकाचे पान फाडले म्हणून शिक्षिकेकडून 9 वर्षीय विद्यार्थ्याला अमानुष मारहाण, रिक्षाचालक वडिलांनी दाखल केली तक्रार

बार्देश: कामुर्ली भागातील एका प्राथमिक शाळेत शिक्षा देण्याच्या हेतूने शिक्षिकेने विद्यार्थ्याला बेदम मारहाण केल्याचा प्रकार उघडकीस आला आहे. या प्रकरणी मुलाच्या रिक्षाचालक वडिलांनी कोलवाळ पोलिसांत दाखल केली असून, पुस्तकाचे पान फाडले म्हणून त्याला शिक्षा देण्यात आल्याचा आरोप त्यांनी केला आहे.

मिळालेल्या माहितीनुसार, कार्मुर्ली भागातील प्राथमिक शाळेत नऊ वर्षीय विद्यार्थ्याला शिक्षिकेने बेदम मारहाण केल्याची घटना उघडकीस आली आहे. विद्यार्थ्यांने पुस्तकाचे पान फाडल्याने शिक्षिकेने शिक्षा दिल्याचा आरोप मुलाच्या वडिलांनी केला आहे. शिक्षिकेने केलेल्या मारहाणीत मुलाच्या हातावर वळ उठले आहेत. तर, त्याला जखम देखील झाली आहे.

विद्यार्थ्यांच्या वडिलांनी याप्रकरणी कोलवाळ पोलिसांत तक्रार दाखल केली आहे. मुलगा नऊ वर्षांचा असून, त्याच्या अंगावर वळ पडले, असा दावा पालकांनी केला आहे. त्या संदर्भात छायाचित्रेही पोलिसांना सादर करण्यात आली आहेत.

पीडित मुलाचे वडील हे रिक्षाचालक आहेत. अशा पद्धतीने शिक्षा देणे अयोग्य आहे. आपल्याला न्याय द्या, अशी त्यांनी पोलिसांकडे मागणी केली आहे.

दरम्यान, या घटनेमुळे सर्व स्तरातून संताप व्यक्त केला जात आहे. लहान विद्यार्थ्याला अशाप्रकारे मारहाण करणे चुकीचे असल्याचे नागरिकांनी म्हटले आहे.