Tashkent To Goa Flight: ताश्कंद ते गोवा थेट विमानसेवा सुरु होणार; ''जगभरातील पर्यटकांना...''

गोव्याने नवीन आंतरराष्ट्रीय मार्गाचे स्वागत केले आहे. उझबेकिस्तान एअरवेजने ताश्कंद-मोपा फ्लाइट्सची सुरुवात केली. उझबेकिस्तान एअरवेजने अधिकृतपणे ताश्कंदहून गोव्याला थेट उड्डाणांची घोषणा केली आहे. ही प्लाइट 27 ऑक्टोबर 2024 पासून आठवड्यातून दोनदा चालवली जाईल. अत्याधुनिक एअरबस A320 निओ विमानाद्वारे ही सेवा दिली जाईल, जी ताश्कंदला मनोहर आंतरराष्ट्रीय विमानतळ (मोपा) शी जोडेल, जी उझबेकिस्तान आणि गोव्यातील पर्यटन आणि सांस्कृतिक देवाणघेवाणीसाठी नवीन मार्ग खुले करेल.

दरम्यान, उझबेकिस्तानच्या दूतावास तसेच ताश्कंदमधील भारतीय दूतावासाच्या महत्त्वपूर्ण सहकार्यामुळे या प्लाइटची सुरुवात झाली आहे. गोवा पर्यटन विभागाने महत्त्वपूर्ण भूमिका बजावली आहे. गोव्याला आंतरराष्ट्रीय स्तरावर ओळख मिळवण्याच्या दृष्टीने गोवा पर्यटन विभाग ताश्कंद आंतरराष्ट्रीय पर्यटन मेळाव्यात (TITF) देखील सहभागी होईल.

पर्यटन मंत्री रोहन ए. खवंटे यांनी या प्लाइटचे स्वागत केले. पर्यटनमंत्री खवंटे म्हणाले की, “ताश्कंदहून गोव्याला थेट प्लाइट सुरु होणे हा मध्य आशियाशी गोव्याला जोडण्याचा एक मोठा टप्पा आहे. ही नवीन जोडणी केवळ गोव्याच्या पर्यटनालाच चालना देणार नाही, तर उझबेकिस्तानशी आपले सांस्कृतिक संबंधही मजबूत करेल. आम्ही जगभरातील पर्यटकांना गोव्याशी जोडण्यासाठी कटीबद्ध आहोत.”

हा नवीन मार्ग गोव्याच्या पर्यटन क्षेत्राच्या विस्ताराच्या दृष्टीने व्यापक धोरणाचा भाग आहे. त्याचबरोबर गोवा पर्यटन विभाग उझबेकिस्तानमधून येणाऱ्या पर्यटकांचे स्वागत करण्यास उत्सुक असल्याचे यावेळी खवंटे म्हणाले.