संशय खरा ठरला, वार्का हत्ये प्रकरणी लेकीला अटक

मडगाव : वार्का येथे झालेल्या त्रिनिदाद मार्टिन्स या 80 वर्षीय वृद्धाच्या खून प्रकरणी त्याची मुलगी जुबेल मार्टिन्स (37) हिला आज कोलवा पोलिसांनी अटक केली. मागचे तीन दिवस पोलिसांनी तिची चौकशी चालू ठेवली होती.

तीन दिवसापूर्वी रात्री आठच्या सुमारास वार्का (varca) परिसरात हा खून झाला होता. आपल्या मुलीशी पटत नसल्याने घरात एकटाच राहणाऱ्या या वृद्धाच्या डोक्यावर लोखंडी दांड्याचा प्रहार करून त्याचा खून (murder) करण्यात आला होता.

पोलिसांनी (police) या प्रकरणी अज्ञाता विराधात बेकायदेशीर रित्या घरात शिरून खून केल्याचा गुन्हा नोंद केला होता. मार्टिन्स याचे आपल्या मुलीशी नाते तणावाचे होते. घराच्या मालकीवरून त्यांच्यात वाद होता. त्यामुळे हा खून त्याच्याच मुलीने केला असावा असा संशय पोलिसांना होता. शेवटी हा संशय खरा ठरला.