Bicholim Theft: डिचोली चोरीप्रकरणी संशयिताला अटक; अन्य 'मंदिरफोडी प्रकरणांशी' संबंध आहे का याबाबत तपास सुरु

Goa Theft News

डिचोली: शहरातील श्री शिवलिंग मंदिरातील चोरीप्रकरणी एका संशयित युवकाला पोलिसांनी अटक केली आहे. डिचोली शहरातील बंदरवाडा येथे राहणारा आकाश भीमाप्पा तालकेरी (२३) असे त्‍याचे नाव आहे.

गेल्या अडीच महिन्यांत शहरातील अन्य मंदिर फोडण्याच्या प्रकरणात संशयित युवकाचा हात आहे की नाही, त्यादिशेने पोलिस तपास करीत आहेत. गुरुवारी मध्यरात्री शहरातील वृंदावन अपार्टमेंटमधील शिवलिंग मंदिरातील फंडपेटी फोडण्याचा प्रकार घडला होता. याप्रकरणी देवस्थानचे अध्यक्ष दिगंबर परब यांनी डिचोली पोलिसात तक्रार दाखल केली होती. पोलिसांनी भारतीय दंड संहितेच्या ३०५ आणि ३३१(४) कलमाखाली गुन्हा नोंद करुन तपास सुरू केला होता.

मिळालेल्या धाग्यादोऱ्यांच्या आधारे पोलिसांनी कारवाई करुन संशयित युवकाला अटक केली. उत्तर गोवा पोलिस अधीक्षक अक्षत कौशल, डिचोलीचे पोलिस उपअधीक्षक सागर एकोस्कर आणि पोलिस निरीक्षक दिनेश गडेकर यांच्या मार्गदर्शनाखाली उपनिरीक्षक विराज धावस्कर आणि आकाश परवार यांच्या नेतृत्वाखालील पोलिस पथकाने ही कारवाई केली.