Goa Accident: अपघातातून बचावला म्हणून निश्वास सोडला पण काळाने घात केला, ट्रक चालकाचा दुर्दैवी अंत

Goa Accident गेले काही दिवस राज्यात अपघातांचं सत्र सुरूच आहे. अपघातांची संख्या दिवसेंदिवस वाढतेय. दुचाकी-चारचाकी वाहनांसोबत ट्रक, बसेस या मोठ्या वाहनांचे अपघातही मोठ्या प्रमाणात होत आहेत.

असाच एक अपघात काणकोण येथे घडलाय. गोव्याहून कर्नाटककडे कोळसा वाहतूक करणारा ट्रक ( क्रमांक CG 15 DF 9816) काणकोण लोलये येथे एका तीव्र चढावावर कलंडला. ही घटना रविवारी रात्री 1 च्या सुमारास घडली.

समोर आलेल्या माहितीनुसार, हा ट्रक कोळशाची वाहतूक करत होता, दरम्यान चढावावर गिअर बदलताना चालकाचे नियंत्रण सुटल्याने ट्रक कलंडला असल्याचे येथील नागरिकांचे म्हणणे आहे.

घटना घडल्यावर ट्रक चालकाने प्रसंगावधान राखत आपला जीव वाचवला मात्र दुर्दैवाने त्याचा जीव वाचवण्याचा हा प्रयत्न काही काळातच फोल ठरला.

या घटनेसंबंधीत काही फोटोज आणि व्हिडिओ समोर आले आहेत. घटनेनंतर ट्रक ड्रायव्हर लिफ्ट मागून कर्नाटक येथे जात होता मात्र जाताना कारवार येथे त्याच्या गाडीला अपघात झाला आणि त्या अपघातातच त्याचा मृत्यू झाला असल्याचे समोर येतेय.

या घटनेचा तपास कर्नाटक पोलीस करत असून पोलिसांनी काणकोण येथेही भेट देऊन अपघाग्रस्त ट्रकची पाहणी केलीय. ट्रक ड्रायव्हरला कारवारमध्ये नेमका अपघात झाला याचाही शोध कर्नाटक पोलीस घेत आहेत