पणजी: गोव्यात सनबर्न ईडीएम महोत्सवावेळी अमलीपदार्थांचा व्यवहार होत असल्याची बदनामी करण्यात आल्याने स्पेसबाऊंड वेब लॅब्स प्रा. लि. कंपनीने सादर केलेल्या १०० कोटींच्या मानहानीच्या दाव्यावरील सुनावणीवेळी मुंबई उच्च न्यायालयाने अंतरिम आदेश देताना प्रतिवाद्यांना कोणत्याही प्रकारची बदनामी करण्याची वक्तव्ये करण्यास तात्पुरता प्रतिबंध घातला आहे.
तसेच या अर्जावरील सुनावणी २४ ऑक्टोबरपर्यंत तहकूब केली. त्यामुळे या अर्जावरील पुढील सुनावणीपर्यंत सनबर्नसंदर्भात आरोप करण्यास प्रतिवाद्यांना लगाम बसला आहे.
सनबर्न ईडीएम महोत्सव आयोजक कंपनीने दाखल केलेल्या मानहानीच्या अर्जात दक्षिण गोवा खासदार कॅ. विरियातो फर्नांडिस, 'आप'चे आमदार वेन्झी व्हिएगस, आमदार क्रुझ सिल्वा, काँग्रेसचे विरोधी पक्षनेते युरी आलेमाव, क्लियोफातो कुतिन्हो, छाया गाड, 'गोंयचे फुडले पिळगे खातीर' तसेच काही प्रसार माध्यमांना प्रतिवादी केले आहे.
न्यायालयात हा अर्ज प्रलंबित असतानाही बदनामी करण्याचे प्रकार सुरूच आहेत. त्यामुळे अंतरिम आदेश द्यावा, अशी विनंती अर्जदाराचे वकील तांबोळी यांनी केली. प्रतिवाद्यांना नोटीस बजावूनही ते उपस्थित राहिले नाहीत व त्यांनी स्पष्टीकरणही केलेले नाही.
त्यांनी केलेल्या वक्तव्याचा इन्कार केलेला नाही. त्यामुळे अर्जदाराच्या वकिलांनी उपस्थित केलेल्या मुद्यांमध्ये सध्या तथ्य असल्याने अंतरिम आदेश देण्यात येत असल्याचे न्यायालयाने म्हटले आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.