'सुदिन ढवळीकरांना महत्त्वाची खाती मिळणार नाहीत'

पणजी: मगोपला पक्षश्रेष्ठींच्या आग्रहाखातर मंत्रिमंडळात सामावून घेतले असले तरी त्यांनी वीज यासारखे महत्त्वाचे खाते दिले जाणार नाही. शिक्षण खाते भाजपसाठी महत्त्वाचे असल्याने तेही त्यांना दिले जाऊ नये, यासाठी भाजपमधील दबावगट काम करत आहे. नव्याने मंत्रिमडळात समावेश केलेले तीन मंत्री आणि भाजपला पाठिंबा देणारे अपक्ष यांना एकाबरोबरच खाती व महामंडळे दिली जाणार आहेत. त्यासाठी चर्चा सुरू आहे. रविवारी रामनवमीमुळे यासंदर्भात कोणताही खल झाला नाही. प्रत्यक्ष खातेवाटपासाठी आणखी चार दिवस लागू शकतात.

भाजप सूत्रांनी ‘गोमन्तक’ला दिलेल्या माहितीनुसार, सध्या वाटप न झालेल्या खात्यांमध्ये वीज आणि शिक्षण ही दोन महत्त्वाची खाती आहेत. ज्येष्ठतेनुसार सुदिन ढवळीकर यांना वीज खाते दिले जाऊ शकत होते. ढवळीकरांनाही वीज आणि शिक्षण दोन्ही महत्त्वाची खाती हवी आहेत. परंतु वीज खाते त्यांना देण्यास भाजपच्या सुकाणू समितीने विरोध केला आहे.

‘वीज खाते लोकांचे समाधान करण्यासाठी महत्त्वाचे खाते आहे आणि ते भाजपच्या सदस्यांकडेच असावे, असा आमचा आग्रह आहे आणि मुख्यमंत्री प्रमोद सावंत यांना आमचा दावा पटला आहे’ अशी माहिती भाजपच्या सुकाणू समितीच्या एका ज्येष्ठ सदस्याने ‘गोमन्तक’ला दिली.

सूत्रांनी दिलेल्या माहितीनुसार, ढवळीकर यांनी भाजपच्या केंद्रीय नेतृत्वाशी संपर्क साधला आहे. आपल्याला सार्वजनिक बांधकाम खाते द्यावे. मगोप भविष्यामध्ये भाजपबरोबर राहू इच्छितो. तशी ग्वाही आम्ही देण्यास तयार आहोत. त्यासाठी महत्त्वाचे खाते आम्हाला मिळणे भाग आहे, असा युक्तिवाद ढवळीकर यांनी केला आहे.