दक्षिण गोव्यात 4 पर्यटकांना बुडण्यापासून वाचवण्यात यश

गोव्याचे निसर्गसौंदर्य अनुभवण्यासाठी देश-परदेशातील पर्यटक गोव्यात दाखल होत असतात. यावेळी ते अनेक जलक्रीडा प्रकरांमध्ये भाग घेतात. दरम्यान पर्यटकांसोबत खूपदा दुर्घटनादेखील घडतात. अशाच काही दुर्घटना दक्षिण गोव्यात (South Goa) घडली आहे. पाण्यात कयाकमधून सफर करत असताना काही पर्यटक बुडाल्याची घटना घडली आहे.

दक्षिण गोव्यात आठवड्याच्या शेवटी काणकोणमधील चारजण पाण्यात बुडाले होते. यावेळी बचावकार्य करून त्यांना सुखरूप वाचवण्यात आले. पाळोळे येथे दोन पर्यटकांना वाचवले असून दोघेही बेंगळुरूचे आहेत. त्यांची कयाक उलटल्यानंतर ते पाण्यात बुडाले होते. यावेळी जीवरक्षक सर्वेश गोवेकर यांनी त्यांच्या जेट स्कीसह धाव घेतली आणि त्यांना सुरक्षित ठिकाणी आणले.

जीवरक्षकांद्वारे आणखी दोन बचावकार्य हाती घेण्यात आले ज्यात दिल्लीतील एका 33 वर्षीय महिला पर्यटकाची अगोंदा येथे सुटका करण्यात आली, तर 27 वर्षीय पुरुष पर्यटकाची बायणा येथे सुटका करण्यात आली. याशिवाय कळंगुट समुद्रकिनारी एक 8 वर्षांची मुलगी बेपत्ता झाल्याची नोंद करण्यात आली असून, बराच शोध घेतल्यानंतर ती सापडली आणि पोलिसांच्या उपस्थितीत तिच्या नातेवाईकांच्या ताब्यात देण्यात आली. अशाप्रकारे एकूण 4 बचावकार्ये करण्यात आली.