"दिव्यांगांना कोणी कोणत्याही क्षेत्रात आता कमी लेखू नये" मंत्री शिरोडकर; फोंड्यात पर्पल फेस्टिव्हलअंतर्गत क्रिकेट स्पर्धा

फोंडा: दिव्यांग असूनही आज ही माणसे कोणत्याही क्षेत्रात मागे नाहीत, त्यामुळे इतरांपेक्षा दिव्यांगांना कुणी कमी लेखू नये आणि दिव्यांगांनीही स्वतःला कमी समजू नये, असे आवाहन सहकारमंत्री सुभाष शिरोडकर यांनी केले.

कुर्टी - फोंडा येथील पर्पल फेस्टिव्हल अंतर्गत आज मंगळवारी शुभारंभ करण्यात आलेल्या दिव्यांग क्रिकेट स्पर्धेच्या उद्‍घाटनावेळी सुभाष शिरोडकर बोलत होते. यावेळी व्यासपीठावर समाज कल्याणमंत्री सुभाष फळदेसाई, भाटीकर ट्रस्टचे डॉ. केतन भाटीकर, गुरुप्रसाद पावसकर तसेच इतर मान्यवर मंडळी उपस्थित होती.

पर्पल फेस्टिव्हलच्या निमित्ताने दिव्यांगांना एक चांगली संधी उपलब्ध झाली आहे. या जगात कुणीही कमी नाही, दिव्यांगांना परमेश्‍वराने खूप चांगली शक्ती दिली आहे, त्यामुळे ते भाग्यवान असल्याचे सांगून मंत्री सुभाष फळदेसाई यांनी सर्वांना शुभेच्छा दिल्या.

केतन भाटीकर यांनीही आपले विचार व्यक्त करताना पर्पल फेस्टिव्हलच्या निमित्ताने दिव्यांगजनांना एक चांगली संधी उपलब्ध करून दिली असल्याचे नमूद करून या संधीचे सोने करा, असे आवाहन त्यांनी केले. गुरुप्रसाद पावसकर यांनीही स्पर्धेतील सहभागींना शुभेच्छा दिल्या. कुर्टीतील हा दिव्यांगांसाठीचा क्रिकेट खेळ येत्या गुरुवारी २ ऑक्टोबरपर्यंत चालतील.

‘खेळात आनंद घ्या आणि हसत जगा’

मंत्री सुभाष शिरोडकर यांनी सर्व दिव्यांगांचे अभिनंदन करताना इतरांप्रमाणे खेळात आनंद घ्या आणि हसत जगा असा संदेश दिला. पर्पल फेस्टिव्हलच्या माध्यमातून आयोजित या उपक्रमाबद्दल त्यांनी आयोजकांचे कौतुक केले.