वाळपई: वाळपई येथील श्री हनुमान पूर्वप्राथमिक व प्राथमिक शाळेच्या विद्यार्थ्यांनी वेळूस येथील गोवा वन विभागाच्या नर्सरीला शैक्षणिक भेट देऊन निसर्ग संगोपनाचे महत्त्व आत्मसात केले.
यावेळी वाळपई वन विभागाचे राऊंड फॉरेस्टर तुळशीदास गावस यांनी विद्यार्थ्यांसह शिक्षक आणि पालकांचे स्वागत करत वन महोत्सवाचे महत्त्व समजावून सांगितले. माणूस, झाडे व पर्यावरण यांचे नाते स्पष्ट करताना गावस म्हणाले, की झाडांमुळे हवा शुद्ध राहते. पावसाचे प्रमाण योग्य राहते. मातीची धूप थांबते आणि पर्यावरणाचे संतुलन टिकते.
त्यामुळे प्रत्येकाने दरवर्षी किमान एक झाड लावावे आणि त्याची काळजी घ्यावी. त्यानंतर वाळपई वनविभाग व श्री हनुमान शाळेच्या संयुक्त विद्यमाने नर्सरी परिसरातच वन महोत्सव साजरा करण्यात आला. राऊंड फॉरेस्टर तुळशीदास गावस, फॉरेस्ट गार्ड सहदेव गावकर, शिक्षक, विद्यार्थी व पालक यांनी झाडे लावली.
यावेळी ‘एक पेड माँ के नाम’ या संकल्पनेखाली काही पालकांनी मुलांसोबत झाडे लावली. या कार्यक्रमाच्या यशस्वीतेसाठी वन विभागातील सर्व कर्मचाऱ्यांचे मोलाचे सहकार्य लाभले. शेवटी ज्येष्ठ शिक्षिका राजश्री नाईक यांनी आभार मानले. यावेळी विद्यार्थ्यांना शाळेबाहेर निसर्गरम्य वातावरणात शिकण्याची संधी मिळाल्याचा आनंद लाभला. झाडांशी नाते जोडण्याचा आणि पर्यावरण रक्षणाचा सकारात्मक संदेश घेऊन सर्व विद्यार्थी शाळेत परतले.
औषधी वनस्पतींचा खजिना
गावस यांनी विद्यार्थ्यांना बीज अंकुरण्यापासून ते रोपट्याच्या वाढीपर्यंतची सविस्तर माहिती दिली. बीज कसे रुजते, त्यासाठी योग्य प्रमाणात शेण व माती यांचे मिश्रण कसे तयार करतात, हे त्यांनी प्रत्यक्ष प्रात्यक्षिकातून दाखवले. नर्सरीतील विविध फळझाडे, फूलझाडे यांची वैशिष्ट्ये आणि औषधी वनस्पतींच्या गुणधर्मांचीही माहिती विद्यार्थ्यांना देण्यात आली.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.