Stinking water: कचऱ्याखालून रस्त्यावर दुर्गंधीयुक्त पाणी

सोनसोडो कचरा प्रश्र्नावरुन नगरपालिका, आमदार व सरकारवर सतत टीका केली जात आहे. आता सोनसोडो येथे जो कचरा टाकण्यात आलेला आहे, त्याचे मोठे ढिगारे निर्माण झाले असून व कचरा उचलला नसल्याने कचऱ्याखालील घाणेरडे पाणी रस्त्यावरुन वाहू लागले आहे. त्यामुळे आरोग्यास धोका निर्माण होण्याची स्थिती उदभवली आहे. (Stinking water on Road)

सोनसोडो येथील ज्या रस्त्यावरुन कचऱ्याचे ट्रक आणले जातात तोच रस्ता आता या घाणेरड्या पाण्यामुळे निसरडा झाला आहे. त्यामुळे त्यावरुन ट्रक चालविणे धोक्याचे ठरत आहे.

यासंदर्भात, मडगावातील कचरा साळगाव येथील कचरा प्रकल्पात नेण्यासाठी नगरपालिका गोवा कचरा व्यवस्थापन महामंडळाला लिहणार असल्याचे मुख्य अधिकारी मानुएल बार्रेटो यांनी सांगितले होते.

कचऱ्यातून झिरपणारे पाणी काढून नेण्यासाठी मडगाव नगरपालिकेने तीन टाक्या खरेदी केल्या होत्या. पण सध्या या टाक्या धूळ खात पडलेल्या आहेत. एक दोन टाक्या कचऱ्याखाली गेल्याचे आम्ही पाहिले, असे शॅडो कॉन्सिलचे सावियो कुतिन्हो यांनी सांगितले.