G20 Summit Goa: ‘जी 20’ मुळे राज्य पर्यटनास लाभ

G20 Summit Goa: राज्यात होणाऱ्या ‘जी२०’ च्या बैठका यशस्वी करण्यासाठी विशेष प्रयत्न सुरू आहेत, अशी माहिती राज्यपाल पी. एस. श्रीधरन पिल्लई यांनी दिली आहे. या बैठकांमुळे गोव्याच्या ऐतिहासिक, सांस्कृतिक क्षेत्राच्या विकासासह पर्यटनाला फायदा होईल, असेही ते म्हणाले.

‘जी२०’चे पदाधिकारी आणि प्रतिनिधी मंडळाने आज राज्यपाल पी.एस. श्रीधरन पिल्लई यांची भेट घेऊन ‘जी२०’ बैठकांबाबतचा नियोजन आराखडा सादर केला.

जी-२० परिषदेसाठीचे मुख्य समन्वयक हर्षवर्धन शृंगला, भारतीय पर्यटन मंत्रालयाचे सचिव अरविंद सिंह यांनी येत्या महिन्यापासून गोव्यात होणार असलेल्या आठ बैठकांबाबतची माहिती सादर केली.

यावेळी राज्यपाल पिल्लई यांनी शाश्वत विकास संकल्पनेचा समावेश करण्यावर भर दिला. तसेच या बैठकांदरम्यान गोव्यातील अंतर्गत भागातील पर्यटनासही प्रोत्साहन देण्याची सूचना केली.

गोव्यामध्ये या परिषदेचे स्वागत करून राज्यपाल यांनी गोव्यातील श्रीमंत संस्कृती व वारसा यांचाही प्रसार करण्याची सूचना पदाधिकाऱ्यांना केली.

गोवा हा सांस्कृतिक आणि वास्तुशिल्प कलेबाबत श्रीमंत प्रदेश आहे. गोव्यातील या श्रीमंत वारशाची ओळख विदेशी प्रतिनिधींना या बैठकांदरम्यान करून देण्याची गरज त्यांनी यावेळी अधोरेखित केली.

बैठकीवेळी राज्यपालांनी गोव्यातील निसर्ग पर्यटन व गोमंतकीय वृक्षसंपदेचा वारसा यांचाही प्रसार करण्याची गरज मांडली. ‘जी२०’चे शिष्टाचार सचिव आणि राज्य नोडल अधिकारी संजीत रॉड्रिग्ज याप्रसंगी उपस्थित होते.