Sunburn Goa: धारगळमधल्या सनबर्नला अद्याप सरकारची परवानगी नाही!!

धारगळ: येत्या डिसेंबरच्या अखेरीस गोव्यात ‘सनबर्न ईडीएम’ फेस्टीव्हलचे आयोजन करण्‍यात येणार आहे, मात्र उत्तर तसेच दक्षिण गोव्यातून या कार्यक्रमाला विरोध केला जातोय. यालाच अनुसरून स्थानिक भारत नारायण बागकर यांनी मुंबई उच्च न्यायालयाच्या गोवा खंडपीठात जनहितार्थ एक याचिका सादर केली होती.

या याचिकेला उत्तर देताना सनबर्न ईडीएम फेस्टिव्हलला अजूनही राज्य सरकारने तसेच धारगळ पंचायतीने कोणत्याही ठिकाणाला परवानगी दिलेली नाही, अशी माहिती मुंबई उच्च न्यायालयाच्या गोवा खंडपीठात बुधवारी सुनावणीवेळी देण्यात आली.

याचिकादार भरत बागकर याने धारगळ येथील हॉस्पिटल जवळची जागा सनबर्न ईडीएम फेस्टिव्हलसाठी निवडण्यात येत असल्याचे नमूद करून सादर केलेल्या याचिकेवरील सुनावणी 9 डिसेंबरपर्यंत थोपवून ठेवली आहे. या फेस्टिव्हलच्या आयोजकांना परवानगीसाठी केलेल्या अर्जासंदर्भातची माहिती पुढील सुनावणीवेळी सादर करण्याचे निर्देश दिले आहेत.

याचिकादाराने या सनबर्न ईडीएम फेस्टिव्हलसाठी धारगळ येथील जागेचा विचार करण्यात येत असल्याचा दावा केला होता. तसेच त्याला परवानगी दिली असल्यास ती मागे घेण्याचे निर्देश द्यावेत, अशी विनंती केली होती.

या फेस्टिव्हलच्या परवानगीसाठी आयोजकांनी अर्ज केला असून त्यावर अजून कोणताच निर्णय झालेला नाही किंवा परवानगी दिली गेलेली नाही, त्यामुळे सादर केलेली ही याचिका अपरिपक्व असल्याने ती निकालात काढावी, अशी बाजू सरकारी वकिलांनी मांडली आहे.

जनहित याचिकेत सरकारसह पर्यटन संचालक, उत्तर गोवा जिल्हाधिकारी, राज्य प्रदूषण नियंत्रण मंडळ, गोवा किनारपट्टी क्षेत्र व्यवस्थापन प्राधिकरण (जीसीझेडएमए), बार्देश - पेडणे उपजिल्हाधिकारी, पेडणे उपविभागीय पोलिस अधिकारी, पेडणे पोलिस निरीक्षक, मनोहर आंतरराष्ट्रीय विमानतळचे प्राधिकरण जलस्रोत खाते, धारगळ पंचायत सरपंच व सचिव, राष्ट्रीय महामार्ग प्राधिकरण, केंद्र सरकार तसेच सनबर्न फेस्टीव्हलचे आयोजन करत असलेली मे. स्पेसबाऊंड वेब लॅब्स प्रा. लि. कंपनी यांना प्रतिवादी करण्यात आले होते.