गोव्यात खाणी सुरू करा, पण कामगारांचे काय?

फोंडा: राज्यातील बंद खनिज खाणी लीलाव करून पुन्हा सुरू करणार असल्याचे मुख्यमंत्री डॉ. प्रमोद सावंत यांनी जाहीर केल्याने मुख्यमंत्र्यांच्या या निर्णयाचे गोवा खाण मंचचे अध्यक्ष तथा कामगार नेते पुती गावकर यांनी स्वागत केले आहे. फोंड्यात घेतलेल्या पत्रकार परिषदेत पुती गावकर यांनी खाणी सुरू कराच, पण सुरवातीपासून विविध खाण कंपन्यात कामावर असलेल्या कामगारांना पुन्हा कामावर घेऊन ट्रकवाले, मशिनरीवाले यांना आहे तसे काम द्या, अशी मागणी पुती गावकर यांनी केली आहे.

पुती गावकर म्हणाले की, राज्यातील खनिज खाणी बंद झाल्यामुळे खाण अवलंबितांच्या रोजीरोटीवर परिणाम झाला आहे. खाण कंपन्यांनी खाणव्याप्त भागात सुरू असलेल्या काही योजना आणि उपक्रमही बंद केल्याने खाण अवलंबितांसाठी दुष्काळात तेरावा महिना सुरू आहे, त्यामुळे आता लीलावाद्वारे खाणी पुन्हा करून कामगार तसेच इतरांना आहे ते काम देऊन खाणव्याप्त भागातील योजना आणि उपक्रमांचा लाभही खाण अवलंबितांना द्या, असे पुती गावकर यांनी पत्रकारांशी बोलताना सांगितले.

मुख्यमंत्री दिल्लीला गेल्यानंतर केंद्रीय गृहमंत्र्यांनी फटकारले असावे, त्यामुळेच राज्यातील खनिज खाणी शक्य तेवढ्या लवकर सुरू करण्यासाठी मुख्यमंत्र्यांनी कार्यवाही केली असावी, पण काही का असेना खाणी पुन्हा सुरू होत आहेत, ही खाण अवलंबितांसाठी चांगली बाब असून मुख्यमंत्र्यांच्या निर्णयाचे गोवा खाण मंचने स्वागत केले आहे. राज्यातील खाण कामगारांचे प्रश्‍न मांडण्यासाठी आपण मुख्यमंत्र्यांकडे भेट मागितली आहे, ही भेट त्वरित देऊन चर्चा व्हावी, असेही पुती गावकर म्हणाले.

दरम्यान, लीलावाद्वारे आता त्वरित खाणी सुरू होत असतील, तर एवढा काळ सरकार का थांबले असा सवाल करून सगळं काही केंद्र सरकारच्या हाती आहे, मग खाण अवलंबितांची उपेक्षा का केली असाही सवाल पुती गावकर यांनी केला आहे.