Madgaon : गोवा कॅन या ग्राहक संघटनेने केलेल्या तक्रारीनंतर मडगाव पालिकेने शहराच्या विविध भागात व प्रामुख्याने जुन्या बसस्थानकावर सायंकाळच्यावेळी ऑम्लेट पाव व अन्य खाद्यपदार्थ विकणाऱ्या गाडेवाल्यांना व्यवसाय झाल्यावर गाडे तेथे ठेवण्यास मनाई केली होती, पण गाडेवाल्यांनी तो आदेश केराच्या टोपलीत टाकला आहे. त्यामुळे वीस पंचवीस गाडे तेथेच उभे करून ठेवलेल्या स्थितीत दिवसरात्र आढळून येतात.
मडगाव पालिका मुख्याधिकारी रोहित कदम यांच्या समक्ष सेनिटरी निरीक्षक विराज आरांबेकर यांनी गाडेवाल्यांना अन्न व औषध नियंत्रण नियमावलीची अंमलबजावणी करण्याचेही निर्देश दिले होते, पण कोणीच फास्ट फूडवाला त्याची अंमलबजावणी करत नाही की पालिका यंत्रणाही त्याबाबत गंभीर आसल्याचे आढळत नाही. गेल्या दीड दोन महिन्यांत एकाही प्रकरणाची न झालेली नोंद यावरून ते स्पष्ट होते.
शहरात सायंकाळच्यावेळी अनेक भागात असे गाडे येतात व विक्री करून नंतर परत नेले जातात. मात्र, जुन्या बसस्थानकावरील तसेच कोकण रेल्वे स्थानक आके बाजूने ते तसेच ठेवले जातात व त्यामुळे तेथे अस्वच्छता माजून आरोग्य समस्या निर्माण होत असल्याच्या तक्रारी आहेत. नगरपालिकेने हल्लीच रेल्वे स्टेशनसमोर पदपथावर उभे केलेले दोन गाडे ते विना परवाना असल्याचा ठपका ठेवून हटविले होते, पण आता ते पुन्हा उभे ठाकल्यानेही पालिकेच्या कारवाईबाबत प्रश्न उभा राहिला आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
