जनमन उत्सव सर्वेक्षणाला शेल्‍डे पंचायत क्षेत्रातील महिलांचा उत्स्फूर्त प्रतिसाद

मडगाव: महिलांच्या आशा-आकांशा जाणून घेऊन त्यांच्या मतांनुसार गोव्याचा विकास आराखडा तयार करून त्यांच्या अपेक्षांना मूर्त स्वरूप देण्याच्या उद्देशाने ‘गोमन्‍तक’ (Gomantak) ने हाती घेतलेल्या जनमन उत्सव सर्वेक्षणाला (Goa Janman Utsav) गोव्यातील महिलांकडून उत्स्फूर्त प्रतिसाद मिळत आहे. मुरगाव मतदारसंघात सर्वेक्षण पूर्ण झाले आहे. त्‍यात काटे-बायणा येथील महिलांनी आपली मते नोंदविली.

आतापर्यंत मुरगाव तालुक्यातील दाबोळी, मुरगाव तसेच जवळच्या कुठ्ठाळी मतदारसंघात हे सर्वेक्षण पूर्ण झाले असून लवकरच वास्को मतदारसंघात ते सुरू होणार आहे. या माध्यमातून ‘गोमन्‍तक’ गोव्यातील तीन लाख महिलांपर्यंत जाऊन त्यांची मते जाणून घेणार आहे. सध्या दक्षिण गोव्यात कुडतरी आणि कुडचडे मतदारसंघातही हे सर्वेक्षण सुरू आहे. या भागांतूनही त्यास चांगला प्रतिसाद मिळत आहे.

कुडचडे मतदारसंघातील शेल्‍डे पंचायत क्षेत्रात येणाऱ्या चांदेगाळ या वाड्यावर आज सर्वेक्षण करण्यात आले. या भागातील महिलांनी आपली मते नोंदवून त्यात सहभाग घेतला. या महिलांनी ‘गोमन्‍तक’च्या उपक्रमाचे मनापासून कौतुक केले. आतापर्यंत कुडचडे मतदारसंघातील शेळवण व शेल्‍डे या भागात हे सर्वेक्षण झाले आहे. गोव्यातील ४०सही मतदारसंघांत फिरून या सर्वेक्षणाअंतर्गत तब्‍बल तीन लाख महिलांची मते आजमावून घेतली जाणार आहेत. यापूर्वी दक्षिण गोव्यात मडगाव, फातोर्डा, नावेली, काणकोण, केपे, दाबोळी व मुरगाव या मतदारसंघांत हे सर्वेक्षण पूर्ण झाले.