Govind Gaude: क्रीडा संघटनेसाठी मैदान उपलब्ध केले जाईल; गोविंद गावडे

पणजी: क्रीडा संघटनेकडून मागणी झाल्यास ठराविक वेळेपुरते चिखली येथील मैदान उपलब्ध केले जाईल. मात्र त्या मैदानावर फुटबॉल वगळता अन्य खेळांसाठी परवानगी दिली जाणार नाही, असे क्रीडा मंत्री गोविंद गावडे यांनी विधानसभेत स्पष्ट केले.

वास्कोचे आमदार दाजी साळकर यांनी या विषयी प्रश्न विचारला होता. ते म्हणाले, ३६५ दिवसांपैकी ३० दिवसच सरासरी या मैदानाचा वापर होतो असे दिसते. यामुळे होतकरू खेळाडूंसाठी हे मैदान सरावासाठी उपलब्ध केले पाहिजे. आजकाल विद्यार्थी क्रीडांगणाकडे फारसे वळत नाहीत.

यामुळे १५ ऑगस्टला सकाळी लवकर बोलविली तर मुले चक्कर येऊन पडतात. मुलांना मोबाईलकडून मैदानाकडे नेण्यासाठी अशी मैदाने उपलब्ध केली पाहिजेत. वास्कोत एमपीटी मैदान होते, मुले दिवस रात्र तिथे असायची. आता त्या मैदानाच्या जागी ट्रक टर्मिनस करण्याचा बेत ऐकू येत आहे.

गावडे म्हणाले, चिखली मैदानाची आवश्यक ती दुरुस्ती १८० दिवसांत काम पूर्ण करून केली जाणार आहे. फिफा १७ वर्षाखालील सराव सामने या मैदानावर झालेले आहेत. भारत नेदरलँड मैत्रीपूर्ण सामनाही झाला.

टिळक मैदान खुले ठेवण्याचा प्रस्ताव व विनंती आलेली नाही. या मैदानावरील सुविधा या आंतरराष्ट्रीय दर्जाच्या असल्यामुळे स्थानिक पातळीवर कोणी तरी या मैदानाची जबाबदारी घेतली पाहिजे. उतोर्डा, बाणावलीची मैदाने स्थानिकांना उपलब्ध केली आहेत, त्या धर्तीवर हे मैदान स्थानिकांना ठराविक वेळे पुरते उपलब्ध करता येते.

कुडचड्याचे आमदार नीलेश काब्राल यांनी यापूर्वी मैदानाचे कामे घेऊन ती पूर्ण न करणाऱ्या कंत्राटदारांवर नवी कामे घेण्यास बंदी घालावी अशी सूचना केली. मांद्रेचे आमदार जीत आरोलकर यांनी सरकारने कोणाकडूनही प्रस्ताव येण्यापूर्वी खेळाडूंच्या नोंदी तपासून शालेय ते राष्ट्रीय पातळीवर खेळणाऱ्या खेळाडूंसाठी ही मैदाने ओळखपत्रांच्या बदल्यात खुली करावी, अशी मागणी केली.