Goa Legislative Assembly Session: ‘प्रत्येक पक्षाला चर्चेसाठी मिळणार अर्धा तास’; तवडकर

विधानसभा अधिवेशनात प्रत्येक पक्षाला चर्चेत सहभागी होण्यासाठी केवळ अर्धा तास दिला जाईल. सभापतिपदी असताना प्रतापसिंह राणे सायंकाळी ७ वाजता कमकाज संपवायचे. आताही तसे करणे शक्य आहे, असे सभापती रमेश तवडकर यांनी आज विधानसभा कामकाज सल्लागार समितीच्या बैठकीनंतर सांगितले. विरोधकांनी पुरेसा वेळ दिला जात नाही, त्यामुळे किमान एक तास प्रत्येक पक्षाला दिला जावा, अशी मागणी बैठकीत केली होती.

त्याबाबत सभापतींना विचारले असता ते म्हणाले, कामकाज १८ दिवस चालणार आहे. त्यामुळे चर्चेसाठी पुरेशी संधी प्रत्येकाला मिळणार आहे. विधानसभा अधिवेशनाच्या सुरवातीला सर्वांत उत्साह असतो, नंतर तो किती टिकतो हे जनतेलाही माहीत आहे. सभापती म्हणून मी सर्वांना समान न्याय देतो. सत्ताधारी व विरोधक यांना समान वेळ देतो. प्रत्येक पक्षाने आपल्या पक्षाकडून कोण केव्हा कोणत्या विषयावर बोलणार याचे नियोजन केल्यास सर्व विषय ते १८ दिवसांत मांडू शकतात.

विरोधकांनी प्रश्नांची उत्तरे वेळेत मिळत नाहीत अशा तक्रारी केल्याबाबत विचारले असता त्यांनी सांगितले, की काही प्रश्न ८-१० खात्यांशी संबंधित असतात. त्यामुळे माहिती संकलनात वेळ जातो. त्यामुळे आमदारांनी एकाच खात्याशी संबंधित, मुद्देसूद प्रश्न विचारावेत अशी सूचना केली आहे. प्रशासनानेही वेळेत उत्तरे द्यावीत अशी सूचना केली आहे, असे त्यांनी सांगितले.