Goa: कोरोनानंतर अनेकांचा आकस्मिक मृत्यू

चिंताजनक बाब : दक्षिण गोव्यात पन्नाशीतील 73 जणांचे निधन झाले आहे.
Corona
Corona Dainik Gomantak

Goa: धडधाकट दिसणारी पन्नाशी खालील व्यक्ती चालता चालता कोसळते आणि काही क्षणातच ती मृत पावते. कोविडच्या प्रादुर्भावानंतर राज्यात अशा मृत्यूंचे प्रमाण लक्षणीयरीत्या वाढले असून एका दक्षिण गोवा इस्पितळातच अशा 73 मृत्यूंची नोंद झाली आहे.

दक्षिण गोवा जिल्हा रुग्णालयाचे प्रमुख शवचिकित्सक डॉ. मधू घोडकिरीकर यांनी ही माहिती दिली.

कोविडनंतर फक्त गोव्यातच नव्हे, तर संपूर्ण देशात अशा मृत्यूंचे प्रमाण वाढले असून ही एक चिंता करण्याची बाब आहे. ही संख्या फक्त जिल्हा इस्पितळात ज्यांची शवचिकित्सा केली त्यांचीच आहे. त्यामुळे प्रत्यक्षात अशा मृतांची संख्या बरीच अधिक असण्याची शक्यता त्यांनी नाकारली नाही.

दक्षिण जिल्हा इस्पितळाचा शवचिकित्सा विभाग पूर्ण क्षमतेने कार्यरत होऊन काल एक वर्ष पूर्ण झाले. त्यानिमित्त डॉ. घोडकिरीकर यांनी प्रसार माध्यमांच्या प्रतिनिधींशी संवाद साधला, त्यावेळी त्यांनी ही माहिती दिली. ते म्हणाले, या सर्व व्यक्ती 50 च्या आतील होत्या.

त्यातील काहीजण तर ऐन 35 शीतील होते. सहा व्यक्ती तर अशा होत्या की त्यांना विमानतळावर आकस्मिक मृत्यू आला. त्यातील चारजण विमान प्रवास करून आले होते, तर दोघांना विमानात प्रवेश करताना ह्रदयविकाराचा तीव्र झटका आल्याने त्यांना आकस्मिक मृत्यू आला.

डॉ. घोडकिरीकर यांनी दिलेल्या माहितीनुसार, मागच्या वर्षभरात या शवागारात 57वाहन अपघाती मृत्यू आलेल्यांची वैद्यकीय तपासणी करण्यात आली. दक्षिण गोव्यात प्रत्येक तिसऱ्या दिवसाला एक व्यक्ती अपघातात किंवा आत्महत्या करून मृत्यू पावली आहे. ही संख्याही कोविडनंतरच वाढली आहे.

मागच्या वर्षभरात या शवागारात एकूण 559 मृतदेहांची चिकित्सा केली. वरची आकडेवारी शिवाय अन्य मृत्यूमध्ये 35 प्रकरणे रेल्वे अपघातांशी, 24 बुडून मृत्यू, आठ कोविड मृत, तर प्रत्येकी 2 मृत्यू विजेच्या धक्क्याने, विषबाधा, गळा आवळून, श्वास कोंडून झाले, तर प्रत्येकी एक मृत्यू विषारी साप चावून आणि भाजल्याने झाला, अशी माहिती त्यांनी दिली.

Corona
Mapusa: बोडगेश्‍वर देवस्थान जत्रेसाठी लोटला महासागर

‘मृत्यूमागे लसीचा संबंध नाही’

पन्नाशीखालील व्यक्तींचा अशा आकस्मिक मृत्यूमागे कोविड लसीचा काही संबंध आहे का असे दक्षिण गोवा जिल्हा रुग्णालयाचे प्रमुख शवचिकित्सक डॉ. मधू घोडकिरीकर यांना विचारले असता त्यांनी हे मृत्यू आणि लस यांचा एकमेकांशी काही संबंध नाही. एक तर तणावामुळे किंवा प्रतिकार शक्ती क्षीण झाल्याने हे मृत्यू होत असावेत असा अंदाज त्यांनी व्यक्त केला.

कोविडनंतर राज्यात गळफास घेऊन आत्महत्या करण्याचे प्रकारही वाढले असून मागच्या एका वर्षात दक्षिण गोवा इस्पितळात अशाप्रकारे मृत्यू आलेल्या 93 मृतांची वैद्यकीय तपासणी केल्याची माहिती डॉ. मधू घोडकिरीकर यांनी दिली. अशा मृत्यूंचे हे प्रमाण संपूर्ण राज्यात एक तृतीयांश असल्याचे ते म्हणाले.

Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.

दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.

Related Stories

No stories found.
Dainik Gomantak | दैनिक गोमन्तक
dainikgomantak.esakal.com