Som Yag Yadnya 2023: गोव्यात आजपासून महासोमयाग

Som Yag Yadnya Festival 2023 Goa

आजपासून महासोमयाग : विश्‍वकल्याणासाठी गोमन्तक-सकाळ माध्यम समूहातर्फे आयोजन

जगभरातील वाढते प्रदूषण आणि मानवी जीवनातील धकाधकीच्या प्रतिकूल परिस्थितीमध्ये सकारात्मक ऊर्जानिर्मिती, वातावरण शुद्धी, मनोबल वृद्धी आणि आध्यात्मिक समाधानासाठी गोमन्तक-सकाळ माध्यम समूहाच्या वतीने 5 ते 10 फेब्रुवारी या कालावधीत अग्निष्टोम महासोमयागाचे आयोजन करण्यात आले आहे.

या अग्निष्टोम महासोमयागासाठी यागाचे यजमान सोमयाजी सुहोता दीपक दीक्षित आपटे यांच्या निवासस्थानावरून शनिवारी अग्नीचे दिंडीने वाजत-गाजत यज्ञ स्थळावर आगमन झाले.

यावेळी विश्‍वाटी विश्‍वेश्‍वर मंदिर परिसरात काढण्यात आलेल्या सवाद्य दिंडीमध्ये भाविकांनी सहभाग घेतला. रविवारपासून (दि. 5) यज्ञस्थळावर पुण्याहवाचन, ऋत्विकवरण व यजमान दीक्षा ग्रहणाने यज्ञास सुरुवात होणार आहे. दुपारी सर्वांसाठी महाप्रसादाची व्यवस्था करण्यात आली आहे.

हा महासोमयाग सहा दिवस सकाळी 9 ते सायंकाळी 7 वाजेपर्यंत होणार आहे. या यागाची सांगता 10 फेब्रुवारी रोजी सकाळी अवधृत स्नानाने होईल. या महासोमयागाच्या आध्यात्मिक परिणामांचे शास्त्रीय कसोटीवर परीक्षणही करण्यात येणार आहे.

याग काळात गोमंतकीयांनी मोठ्या संख्येने यज्ञस्थळी उपस्थित राहावे, असे आवाहन गोमन्तक आणि सकाळ माध्यम समूहातर्फे करण्यात आले आहे.