'तो' जिद्दीने पोहला, पण लाटांच्या तडाख्यापुढे हरला; मासेमारीसाठी गेलेल्या खलाशाचा सिकेरीत बुडून मृत्यू

म्हापसा: सिकेरी-कांदोळी येथे मासेमारीसाठी गेलेल्या नेरुळ येथील उमेश दाभोळकर (४०) या खलाशाचा समुद्रात बुडून मृत्यू झाला.

मंगळवारी सकाळी ७ वाजण्याच्या सुमारास ही दुर्घटना घडली. समुद्रात बुडाल्यानंतर उमेश यांनी फ्लोटरच्या साहाय्याने पोहत किनाऱ्यावर पोहोचण्याचा आटोकाट प्रयत्न केला; मात्र, प्रचंड लाटांच्या तडाख्यामुळे त्यांचा प्रयत्न अपयशी ठरला.

उमेश हे त्यांचा भाऊ आणि अन्य दोन सहकाऱ्यांसोबत मोटारहोडीतून सिकेरी किनाऱ्यावर मासेमारीसाठी गेले होते. मासेमारी सुरू असताना अचानक आलेल्या मोठ्या लाटेमुळे होडीत पाणी शिरले. त्यामुळे उमेश समुद्रात फेकले गेले.

त्यांना वाचविण्यासाठी सहकाऱ्यांनी तातडीने फ्लोटर समुद्रात फेकला. उमेश यांनी तो पकडला आणि पोहत किनाऱ्याच्या दिशेने येण्यास सुरुवात केली. पोहत-पोहत ते जवळपास किनाऱ्यापर्यंत पोहोचले होते. मात्र, त्याचवेळी आलेल्या प्रचंड लाटेने त्यांना पुन्हा समुद्रात खेचून नेले. त्यानंतर त्यांचा ठावठिकाणा लागला नाही. मृतदेहाचा शोध घेण्याची मोहीम सुरु आहे.