Accident Death: दिव्यांग सिडनी डिसोझा (वय 40वर्षे) याचे मंगळवारी उपचारादरम्यान गोमेकॉत निधन झाले. शवचिकित्सेनंतर त्याचा मृतदेह भाऊ रिचर्ड डिसोझा यांच्याकडे सुपूर्द केला. सिडनीच्या पार्थिवावर हळदोणा येथे बुधवारी (ता.13) संध्याकाळी 4 वाजता अंत्यसंस्कार करण्यात येणार असल्याची माहिती कुटुंबीयांनी दिली.
सिडनीच्या मृत्यूस प्रशासन जबाबदार असून याप्रकरणी चाैकशी करावी, अशी मागणी त्यांच्या कुटुंबीयांनी केली आहे.
30 ऑगस्ट रोजी पर्वरीतील इमारतीमधील लोखंडी रेलिंग्स जीर्ण झाल्याने ते मोडले आणि सिडनी खाली पडला.
ज्या इमारतीत ही घटना घडली तिथे संजय स्कूलचे दोन वर्ग, आधार कार्ड केंद्र, जनशिक्षण अभियान व समग्र शिक्षा अभियान ही कार्यालये सुरू असून दुसरा अपघात होण्याची सरकार वाट पाहते का? अशी प्रतिक्रिया एक पालक संजय नाईक यांनी व्यक्त केली.
गोमेकॉत हेळसांड : सिडनीच्या मामी रोझ सिक्वेरा म्हणाल्या, की आम्हाला गोमेकॉत प्रचंड त्रास झाला. सिडनीच्या ॲडमिशनवेळी आयसीयूमध्ये बेड उपलब्ध नसल्याचे सांगण्यात आले. जीएमसीमध्ये दाखल केल्यापासून दहा दिवसांत आपत्कालीन विभाग, आयसीयू, वाॅर्ड नं 111, 123 आणि व्हेंटिलेशन वारंवार बदलले. सिडनीच्या मृत्यूस प्रशासनच जबाबदार आहे.
शवचिकित्सा अहवालानंतर कारवाई
यासंदर्भात पर्वरी पोलिस स्थानकाचे निरीक्षक अनंत गावकर यांच्याशी संपर्क साधला असता ते म्हणाले, की पर्वरी पोलिस स्थानकात हा अपघात नोंद झाला आहे. शवचिकित्सेचा अहवाल मिळताच पुढील कारवाई केली जाईल.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
