Khapreshwar Temple: नको सरकारी मदत! लोकवर्गणीतून उभारणार श्री देव खाप्रेश्वराचे देवस्थान, 9 मे रोजी नव्या मूर्तीची प्रतिष्ठापना

पणजी: वडाकडे परिसरातच श्री देव खाप्रेश्वराचे देवस्थान लोकवर्गणीतून उभारण्याचे ठरवण्यात आले आहे. सरकारने घुमटी उभारण्यासाठी देऊ केलेल्या मदतीची गरज नाही, असेही आता सांगण्यात येऊ लागले आहे. या देवस्थानात नव्या मूर्तीची ९ मे रोजी प्रतिष्ठापना करण्यात येणार आहे.

देवस्थान समितीचे अध्यक्ष कार्तिक कुडणेकर यांच्या म्हणण्यानुसार मुळगाव येथील श्री देव वेताळ मंदिरात घेतलेल्या ८ रोजी घेतलेल्या प्रसादानुसार खाप्रेश्वराचे स्थान त्या परिसरातच आहे. दहा पावले मागे पुढे होऊ शकतात. इतर देवतांप्रमाणे स्थळ देवतांचे स्थलांतर करता येत नाही. ब्राह्मणदेव त्याच ठिकाणी आहे असे प्रसादात सांगितले आहे.

काल आम्ही बैठक घेतली कारण मूर्ती प्रतिष्ठापनेविषयी प्रसाद घ्यायचा होता. एप्रिल व मे मधील दोन मुहूर्त होते. त्यातील योग्य कोणता हे प्रसाद लावून विचारायचे ठरवले.

मुळगाव श्री देव वेताळाचा प्रसाद घेतला. ९ मे रोजी मूर्ती प्रतिष्ठापना करण्यास प्रसाद झाला आहे. गावची समिती, गावचे भाविक हे एकत्र येऊन त्याच जागेवर देवस्थान उभे केले जाईल. गावाला सोबत घेऊन हे काम केले जाईल, त्यासाठी निधी जमा केला जाईल. सरकारची मदत घेऊ नये असेही ठरवण्यात आले कारण हे कार्य करण्यासाठी गाव समर्थ आहे.

राखणदेव त्याच ठिकाणी हवा!

राखणदेव त्याच ठिकाणी हवा, क्षेत्रपाल देवाचे स्थलांतर करता येत नाही, अशी त्यांची भावना आहे. यातून कोणी राजकारण करू नये, असेही गावाचे म्हणणे आहे. असे सांगून कार्तिक कुडणेकर म्हणाले,की नवी मूर्ती करण्यासाठी मूर्तिकारासोबत बोलणी झाली आहेत.

रातोरात देवस्थान हटवण्यासाठी घाई का केली, हे अनाकलनीय आहे. देवस्थान हटवल्याने अनेक भक्त दुखावले गेले आहेत. समितीने देवस्थान उभारण्याचे ठरवले आहे.