Goa Dairy: कथित गोवा डेअरी घोटाळा प्रकरण; सहकार निबंधकाकडून 18 संचालकांना नोटीस

Goa Dairy: गोवा डेअरीला तत्कालीन संचालक मंडळ आणि व्यवस्थापकीय संचालकांच्या सदोष निर्णयामुळे सहा कोटी रुपयांचे नुकसान झाल्याचा आरोप करण्यात आला आहे.

याप्रकरणी सहकार निबंधकाकडून संचालक मंडळावर असलेल्या 18 व्यक्तींना कारणे दाखवा नोटीस बजावण्यात आली आहे. उच्च न्यायालयाच्या आदेशानंतर सहकारी संस्थांच्या निबंधकांनी 17 फेब्रुवारी रोजी कथित गोवा डेअरी घोटाळा प्रकरणी सहकारी संस्था निबंधक, पाटो-पणजी येथील कार्यालयात सुनावणी होणार आहे.

मिळालेल्या माहितीनुसार, गोवा डेअरी कथित घोटाळ्याची चौकशी करण्यास सहकारी संस्थांचे निबंधक दिरंगाई करत आहेत. असा आरोप तक्रारदारांनी करत उच्च न्यायालयात धाव घेतली. उच्च न्यायालयाने सहकारी संस्थांच्या निबंधकांना तीन महिन्यांत चौकशी पूर्ण करण्याचे निर्देश दिले होते.

पशुखाद्य निर्मिती केंद्रात दर्जाहीन साहित्य वापरण्यात आल्याचे, म्हशीचे दूध शेजारील राज्यातून अधिक दराने खरेदी करण्यात आले, आईस्क्रीम प्लांटसाठी कमी दर्जाचे मशिन खरेदी करण्यात आले. असे सहाय्यक निबंधकांनी केलेल्या चौकशी अहवालातून समोर आले आहे. याचा फटका गोवा डेअरीला बसला असून यात एक कोटी रुपयांचे नुकसान झाले आहे.