त्याच जागी, आजच होणार शिवरायांच्या पुतळ्याची पुनर्स्थापना; आमदार कार्लुस फेरेरा लावणार हजेरी, पोलिसांना अल्टिमेटम

Karaswada-Acoi Mapusa Goa: म्हापशातील करासवाडा-आकय येथे छत्रपती शिवाजी महाराजांच्या पुतळ्याची अज्ञातांनी मोडतोड केल्याचा प्रकार उघडकीस आला आहे. या घटनेचा राज्यातील शिवप्रेमींकडून निषेध केला जात आहे.

घटनास्थळी म्हापसा पोलीस दाखल झाले असून, पुढील कारवाई सुरू आहे. दरम्यान, शिवप्रेमींनी त्याच त्याच जागी आजच शिवरायांचा पुतळा उभाणार असल्याचे जाहीर केले आहे. आज (सोमवार) सायंकाळी चार ते पाचच्या दरम्यान पुतळ्याची पुनर्स्थापना असे एका शिवप्रेमींनी पत्रकरांशी बोलताना सांगितले.

हळदोणाचे आमदार कार्लुस फेरेरा यांनी घटनास्थळी भेट देऊन परिस्थितीचा आढावा घेतला. फेरेरा यांनी घडलेल्या प्रकाराचा निषेध व्यक्त केला. तसेच याच ठिकाणी छत्रपती शिवरायांचा पुतळा आज सायंकाळी बसविण्यात येईल मी स्वत: या कार्यक्रमासाठी उपस्थित राहणार आहे. असे आमदार कार्लुस फेरेरा म्हणाले.

तसेच, शिवरायांचा पुतळा स्थलांतरीत करण्यासाठी IDC कडे जागेची मागणी करणार असल्याचेही फेरेरा म्हणाले. शिवराय राष्ट्रीय वीर आहेत आणि आपण त्यांचा मान राखयला हवा असेही फेरेरा यावेळी म्हणाले.

खासदार आणि केंद्रीय मंत्री श्रीपाद नाईक यांनी देखील घटनास्थळी भेट दिली. ही घटना देशाच्या एकतेवर आघात असल्याचे नाईक यांनी म्हटले आहे.

कारवाईसाठी पोलिसांना सात दिवसांचा अल्टिमेटम

पुतळ्याची विटंबना केल्याप्रकरणी दोषींवर गुन्हा दाखल करून योग्य कारवाई करावी अन्यथा आंदोलन करण्याचा इशारा शिवप्रेमींनी दिला आहे.

दरम्यान, यापूर्वी आमदार विजय सरदेसाई यांनी देखील या घटनेचा निषेध करत गोवा पोलीस आणि भाजप सरकारवर टीका केली. सरकार समान्य गोमन्तकीयांची आणि छत्रपती शिवराय यांच्यासारख्या राष्ट्रीय वीरांचे संरक्षण करण्यासही असमर्थ ठरल्याचा आरोप त्यांनी केला.