मडगावात सांडपाण्याची समस्या ‘जैसे थे’

मडगाव: किरकोळ भाग सोडला तर मडगावात मलनिस्सारण वाहिन्यांचे जाळे तयार झालेले असले तरी अनेक निवासी व व्यापारी संकुले या योजनेला जोडली गेलेली नाहीत. त्यांचे मलमूत्र व सांडपाणी गटारे व नाल्यात जाण्याचे प्रकार सुरूच असल्याचे नगरपालिकेने हल्लीच केलेल्या तपासणीत आढळून आले आहे.

2009 मध्ये केलेल्या तपासणीचे निष्कर्ष व आताचे निष्कर्ष यात तसा कोणताच फरक नसल्याचे ही संयुक्त पहाणी म्हणते. मडगाव पालिकेच्या तपासणीत सोळा आस्थापने सांडपाणी व मलमूत्र नाल्यात सोडत असल्याचे आढळले आहे. सीवेज जोडण्या न घेतलेल्यांची काही चूक नाही तर जोडण्यांसाठी रस्ता तोडण्यास सार्वजनिक बांधकाम खात्याकडून न मिळालेली परवानगी आहे.

मलनिस्सारण महामंडळ सूत्रांच्या म्हणण्याप्रमाणे कोलमरड, आके येथील किरकोळ बाबी वगळता 90 टक्के भागात वाहिनीचे काम पूर्ण झाले आहे. पण, त्या भागातील जोडण्या झालेल्या नाहीत व त्यातूनच समस्या निर्माण होतात. नगरपालिकेने अशांना नोटिसा बजावलेल्या असल्या तरी त्याचा परिणाम दिसून आलेला नाही.

महामंडळाने त्यासाठी नगरपालिका व प्रदूषण नियंत्रण मंडळाला अशा आस्थापनांचे परवाने नूतनीकरण करू नयेत असा प्रस्ताव सादर केला आहे. तरीही प्रतिसाद न मिळाल्यास सरकारकडे जोडण्यासक्तीची विनंती केली जाईल, अशी माहिती मलनिस्सारण महामंडळाच्या सूत्रांनी दिली.