Benaulim: बाणावलीत मच्छीमारी बोटींना आग लावण्याप्रकरणी एकास अटक

Benaulim Boats and Nets Fire: बाणावलीत बोटींना व मासेमारी जाळींना आग लावल्याप्रकरणी कोलवा पोलिसांनी रोफिलियो फेर्नांडीस या युवकाला अटक केली आहे.

तो वाडी बाणावली येथील रहिवाशी आहे. या प्रकरणातील अन्य एक आरोपी फरारी असून पोलीस त्याच्या शोधात आहे.

(Setting ablaze fishing boats and nets at Benaulim)

वाडी बाणावली येथील समुद्र किनाऱ्यावर नांगरून ठेवलेल्या दोन बोटींना 26 फेब्रुवारी रोजी पहाटे अडीचच्या सुमारास आग लावण्याचा प्रकार घडला होता.

यावेळी बोटमालकांचे 10 ते 12 लाख रुपयांचे नुकसान झाले होते आणि या विषयी त्यानीं अज्ञात व्यक्ती विरुद्ध कोलवा पोलीस स्थानकात तक्रार दाखल केली होती.

पोलीसांनी दिलेल्या माहितीनुसार, पूर्व वैमनस्यातून हा आग लावण्याचा प्रकार घडला. या प्रकरणी स्थानिक आमदार वेन्झी व्हिएगस यांनीही लक्ष घातले होते व याप्रकरणी तपास करण्याची मागणी केली होती.

सासष्टीचे उपअधीक्षक संतोष देसाई यांच्या मार्गदर्शनाखाली निरीक्षक थेरन डिसोजा आणि उपनिरिक्षक सुभाष गावकर यांनी इतर पोलीसांच्या मदतीने त्या तपास करून वरील संशयित आरोपीला अटक केली.