डिचोली पालिका परिसरात दोन दिवसांपासून पाण्याची गंभीर समस्या; नागरिकांचे हाल

डिचोली : डिचोली पालिका क्षेत्रातील काही भागात पुन्हा एकदा पिण्याच्या पाण्याची गंभीर समस्या निर्माण झाली आहे. भर पावसात नळांना पाणी येत नसल्याने नागरिकांचे विशेषतः गृहिणींचे पुरते हाल झाले आहेत. पिण्याच्या पाण्यासाठी सध्या मारामारी झाल्याने नागरिकांना वणवण करावी लागत आहे.

शहरातील कातरवाडा, आयडीसी, जोगीवाडा आदी काही भागात कालपासून (गुरुवारी) नळांना धड पाणी येत नसल्याने नागरिकांना विशेषत: गृहिणींना पाण्यासाठी वणवण करावी लागत आहे.

(Serious water problem from two days in Bicholim goa)

एकाबाजूने पावसाचा जोर वाढला आहे. त्यामुळे पाण्यासाठी घराबाहेर जाणेही अवघड बनले आहे. पाणी पुरवठा खात्याने त्वरित ही समस्या दूर करावी. अशी मागणी नागरिक विशेषतः गृहिणींकडून करण्यात येत आहे. उपलब्ध माहितीनुसार वीज समस्येमुळे पाणी पुरवठ्यावर परिणाम होत असल्याचे समजते. वीस दिवसांपूर्वीही कातरवाडा आदी भागात पाण्याची समस्या निर्माण झाली होती.

पावसाच्या पाण्याचा वापर

काही भागात विहिरी नसल्याने गृहिणींना पाण्यासाठी वणवण करावी लागत आहे. जोगीवाडा येथे विहीर आहे, परंतु ती दूषित आहे. सध्या पावसाचे पाणी साठवून त्या पाण्याचा अंघोळ आणि अन्य दैनंदिन कामासाठी वापर करण्यात येत आहे. असे जोगीवाडा येथील रहिवासी संतोष डिचोलकर आदी नागरिकांनी सांगितले.