Goa Crime News: अवैध वाळू तस्करीबाबत वृत्त संकलन करणाऱ्या पत्रकाराला धमकी, दोघांविरोधात गुन्हा नोंद

Canacona Goa Crime News

अवैध वाळू तस्करीबाबत वृत्त संकलन करण्यासाठी गेलेल्या पत्रकाराला धमकी दिल्याप्रकरणी दोघांविरोधात गुन्हा नोंद करण्यात आला आहे.

गुरुवारी (14 मार्च) रात्रीच्या सुमारास गोवा-कर्नाटकच्या सीमेवरील पोळे तपासणी नाक्यावर ही घटना घडली.

पोलिसांनी भारतीय दंड संहिता कलम 341, 509 आणि 506 अंतर्गत संशयित आरोपी वीरेंद्र नाईक आणि नरेश नाईक यांच्या विरोधात गुन्हा नोंद केला आहे. याप्रकरणी बासुरी देसाई यांनी तक्रार दाखल केली आहे.

बासुरी देसाई अवैध वाळू तस्करीबाबत वृत्त संकलन करण्यासाठी पोळे तपासणी नाका परिसरात गेले असता, संशयितांनी तक्रारदार देसाई यांचा पाठलाग करुन वृत्त प्रसिद्ध केल्यास परिणाम भोगावे लागतील अशा शब्दात धमकी दिली.

यावेळी देसाई यांच्यासोबत असणाऱ्या महिलेला देखील संशयितांनी अश्लिल भाषा वापरत धमकावले असे तक्रारीत म्हटले आहे.

पोलिसांनी तक्रारीवरुन गुन्हा दाखल केला असून, पुढील तपास सुरु आहे. संशयितांनी माहिती देण्यास सहकार्य केले नाही तर त्यांना अटक केली जाईल, अशी माहिती पोलिस उपअधीक्षक टिकम सिंग वर्मा यांनी दिली आहे.