पणजी: पिळगाव- डिचोली येथील ज्येष्ठ व आधुनिक विचारांचे पत्रकार अनंत साळकर यांचे आज निधन झाले. रविवारी संध्याकाळी 7 च्या सुमारास गोमेकॉ इस्पितळातील अतिदक्षता विभागात उपचारादरम्यान त्यांनी अखेरचा श्वास घेतला. ते गेले 8 दिवस मृत्यूशी झुंज देत होते. त्यांच्या निधनाने एका अनुभवी तसेच विविध क्षेत्राबद्दल अभ्यास असलेल्या पत्रकाराची पोकळी निर्माण झाली आहे.
(Senior journalist Anant Salkar passed away)
गेली 22 वर्षे पत्रकारितेत असलेले अनंत साळकर यांनी विविध वृत्तपत्रातून पत्रकारिता केली आहे. त्यांनी आपली पत्रकारिता ‘तरुण भारत’ वृत्तपत्रापासून सुरू केली. त्यावेळी ते या वृत्तपत्राचे आवृत्ती प्रमुख होते. त्यानंतर त्यांनी कोकणी वृत्तपत्र ‘सुनापरान्त’चे संपादक म्हणून काम पाहिले. गोव्यात ‘लोकमत’ वृत्तपत्र सुरू झाल्यानंतर ते 8 वर्षे सहायक संपादक होते. गेल्यावर्षी त्यांनी दै. ‘गोमन्तक’चे सहायक संपादक म्हणून कार्यभार स्वीकारला होता.
त्यांच्या मागे पत्नी अरुंधती व मुलगी मेखला असा परिवार आहे. कुटुंबीयांच्या परवानगीनंतर त्यांचा देह गोमेकॉ इस्पितळाला देण्याचा निर्णय घेण्यात आला. शनिवारी, 1 ऑक्टोबर रोजी अनंत साळकर हे पणजी येथून आपल्या पिळगाव येथील घरी रात्री 9 च्या सुमारास परतत होते. चोडण फेरीबोटीतून ते पिळगाव दिशेने जात असताना रस्त्यावर त्यांच्या दुचाकीसमोर एक डुक्कर आडवे आले. त्यामुळे त्यांचे दुचाकीवरील नियंत्रण सुटून रस्त्यावर जोरात आदळल्याने डोक्याला गंभीर दुखापत झाली होती.
देहदानाची प्रक्रीया उद्या
अनंत साळकर यांच्या देहदानाची प्रक्रीया उद्या (ता.10) सकाळी पूर्ण केली जाणार आहे. त्यानंतर संध्याकाळी 4 वाजल्यापासून त्यांच्या कुटुंबातील सदस्य त्यांच्या राहत्या पिळगाव येथील घरी उपस्थित असतील.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.
