गोव्यात उद्यापासून SCO बैठक; 'या' देशांचे परराष्ट्र मंत्री राहणार उपस्थित, भारत-पाकिस्तान चर्चेकडे लक्ष

SCO Meet In Goa: गोव्यात उद्यापासून (गुरूवार, दि.04) शांघाय सहकार्य संघटनेची परिषद सुरू होणार आहे. या परिषदेत चीन, पाकीस्तान, रशियासह इतर सदस्य देशांचे परराष्ट्र मंत्री 4 आणि 5 मे रोजी गोव्यातील बैठकीला उपस्थित राहतील.

शांघाय कॉपरेटिव्ह ऑर्गनायझेशन ही युरेशियन राजकीय, आर्थिक, आंतरराष्ट्रीय सुरक्षा आणि संरक्षण संस्था आहे.

चीनच्या परराष्ट्र मंत्रालयाने 2 मे रोजी परराष्ट्र मंत्री किन गँग यांच्या गोवा दौर्‍याची अधिकृत माहिती दिली. किन गँग दोन महिन्यांनी पुन्हा भारत दौऱ्यावर येत आहेत. यापूर्वी ते जी -20 परराष्ट्र मंत्र्यांच्या बैठकीसाठी नवी दिल्लीत आले होते. यावेळी त्यांनी परराष्ट्र मंत्री एस. जयशंकर यांच्याशी द्विपक्षीय चर्चा केली होती.

रशियाचे परराष्ट्र मंत्री सर्जी लावरोव गोव्यातील बैठकीला उपस्थित राहतील असे रशियन परराष्ट्र मंत्रालयाने गेल्या आठवड्यात जाहीर केले होते. यावेळी ते एससीओच्या आंतरराष्ट्रीय आणि प्रादेशिक विषयावर चर्चा करतील असे मॉस्कोमध्ये जारी केलेल्या एक प्रसिद्धी पत्रकात म्हटले आहे.

"राज्य परिषद सदस्य आणि परराष्ट्र मंत्री किन गँग इतर SCO सदस्य राष्ट्रांच्या परराष्ट्र मंत्र्यांशी आंतरराष्ट्रीय आणि प्रादेशिक परिस्थिती आणि विविध क्षेत्रांतील SCO सहकार्य, अशा विषयांवर चर्चा करतील." असे बीजिंगमधील चीनच्या परराष्ट्र मंत्रालयाने मंगळवारी दिलेल्या निवेदनात म्हटले आहे.

भारताचे परराष्ट्र मंत्री एस जयशंकर देखील बैठकीला उपस्थिती लावतील. यावेळी प्रामुख्याने पाकिस्तानच्या परराष्ट्र मंत्री यांच्याशी होणाऱ्या चर्चेकडे सर्वांचे लक्ष असेल.

दरम्यान, येत्या जुलैमध्ये चीन आणि रशियाचे राष्ट्राध्यक्ष देखील भारत भेटीवर येणार आहेत. या भेटीच्या पूर्वी आता होणारी बैठक महत्वाची मानली जात आहे.

चीन आणि रशियाच्या नेतृत्वाखालील युरेशियन सुरक्षा गटामध्ये कझाकस्तान, किर्गिस्तान, ताजिकिस्तान आणि उझबेकिस्तान या चार मध्य आशियाई राष्ट्रांचाही समावेश आहे, तर भारत आणि पाकिस्तान 2017 मध्ये या गटात सामील झाले आहेत. इराण आणि बेलारूस या देशांचा देखील यात समावेश होणार असल्याचे सांगितले जात आहे.