Panchayat Election: सभापती रमेश तवडकर यांच्या पत्नी सविता तवडकर यांचा उमेदवारी अर्ज

काणकोण: सभापती रमेश तवडकर (Ramesh Tavadkar) यांच्या पत्नी सविता तवडकर (Savita Tavadkar) पैंगीण पंचायतीच्या निवडणूकीसाठी उमेदवारी अर्ज आज (दि.25) भरला. सविता तवडकर यांनी आमोणे वार्डातून आपला उमेदवारी अर्ज भरला आहे. यावेळी त्यांच्यासोबत माजी जिल्हा पंचायत सदस्य डॉ.पुष्पा अय्या उपस्थित होत्या.

सविता तवडकर बलराम शिक्षण संस्थेच्या आमोणे येथील श्री बलराम निवासी शाळेच्या मुख्याध्यापिका आहेत. प्रथमच त्या पंचायत निवडणूकीच्या रिंगणात उतरल्या आहेत. काणकोणातील यंदा तीन पंचायती महिला सरपंच पदासाठी राखीव ठेवण्याची शक्यता आहे. सात पैकी पैंगीण,लोलये व श्रीस्थळ या पंचायतीच्या पंचायतीचे सरपंच पद महिलांसाठी राखीव ठेवण्याची दाट शक्यता आहे.

दरम्यान, सध्या गोव्यात सर्वदूर पंचायत निवडणूकीसाठी अर्ज भरण्याची लगबग सुरू आहे. प्रतिष्ठीत राजकारणी यांची मुले देखील या निवडणूकीत नशीब आजमावून पाहत आहेत. आमदार मायकल लोबो व डिलायला लोबो या दाम्पत्याचा पुत्र डॅनियल लोबो यांनी पंचायत निवडणूकीत उमेदवारी अर्ज सादर केला. त्यामुळे यावेळची पंचायत निवडणूक रंजक होणार असं दिसतयं.