Savarde: सावर्डे ग्रामसभी तापली! निधी गैरवापरावरून गदारोळ; तासभर गोंधळ, आरोप-प्रत्यारोपाचे वातावरण

केपे: वित्त आयोगाच्या निधीतील खर्च, बेकायदेशीर बंधारा, बाक खरेदी आणि ग्रंथालय स्थापनेच्या मुद्द्यावरून सावर्डे ग्रामपंचायतीची ग्रामसभा रविवारी गाजली. जवळपास तासभर गोंधळ, आरोप-प्रत्यारोपाच्या वातावरणात ग्रामसभेला सुरुवात झाली.

ग्रामस्थांनी सरपंच व सत्ताधारी मंडळाला चौदाव्या वित्त निधीचा गैरवापर केल्याबाबत प्रश्नांचा भडिमार केला. यावेळी मीराबाग येथे सुरू असलेल्या बेकायदेशीर बंधाऱ्याचा मुद्दा विशेष चर्चेत आला. ग्रामस्थांनी कोणत्याही परिस्थितीत हा बंधारा थांबवण्याची मागणी केली.

ग्रंथालय स्थापनेबाबत सत्ताधाऱ्यांनी दिलेले स्पष्टीकरण ग्रामस्थांनी फेटाळले. तर बागेतील बाक खरेदी या विषयावर ग्रामसभेत चांगलाच वाद रंगला. पंचायतीने चौदाव्या वित्त निधीतून ५२ बाक खरेदी करून नऊ वॉर्डांत वाटल्याचे सांगितले.

बांधकाम थांबवा!

संकेत भंडारी म्हणाले, भ्रष्टाचाराच्या आरोपांबाबत पंचायतचे स्पष्टीकरण अजिबात समाधानकारक नाही. मी माहिती अधिकाराअंतर्गत काही कागदपत्रांची मागणी केली असून, ती मिळाल्यानंतर पंचायत, सचिव आणि संबंधित कर्मचाऱ्यांविरुद्ध कायदेशीर कारवाईची मागणी करणार आहे.