सासष्टी, गोव्‍याचे अस्‍तित्‍व संकटात सापडले आहे. त्यासाठी बुद्धिजीवींनी विधायकतेसाठी एकवटले पाहिजे, असा सूर ‘गोवा बचाव अभियान’ सभेतून व्यक्त झाला. यावेळी भूमी रक्षणार्थ काही ठरावही घेण्‍यात आले.
डॉ. लोहिया मैदानावर ही सभा होणार होती. पण त्‍यास मडगाव नगरपालिकेने परवानगी नाकारली. आदर्श वनिता हायस्कूलच्या नरसिंह नायक सभागृहात ती घेण्‍यात येणार होती. पण परवानगी नाकारल्‍याने आज ती ग्रेस चर्च सभागृहात घेण्‍यात आली. या सभेला उत्स्फूर्त प्रतिसाद लाभला.
सर्व वक्त्यांनी गोव्याचा सांस्कृतिक, पर्यावरणीय सांभाळ करण्यावर भर दिला. गोव्‍यासाठी घातक निर्णय लोकांना कळावेत, यासाठी ही सभा आयोजित केल्याचे डॉ. सबिना मार्टिन्स यांनी सांगितले. यावेळी ज्‍येष्‍ठ पत्रकार संदेश प्रभुदेसाई, किशोर नाईक गावकर, धीरेन फडते, जॅक मास्कारेन्हस, अँथनी डिसिल्वा यांची भाषणे झाली.
गोव्‍याचे बदलते स्‍वरूप आणि आपली कर्तव्‍ये यावर वक्त्‍यांचा भर राहिला. संजय नाईक यांनी भोम येथील लोकांविरोधात जाऊन रस्ता बांधण्याचे व त्यासाठी मंदिर पाडण्याचा सरकारच्या उद्देशाबद्दल सांगितले. सेबी फर्नांडिस यांनी सांकवाळ भुतानी प्रकल्पासाठी डोंगर कापणी करण्‍यात येत असल्‍याची माहिती दिली. तर, ग्लेन काब्राल यांनी ओल्ड गोवा येथील बेकायदेशीर बंगल्याची माहिती दिली. पत्रकार संदेश प्रभुदेसाई यांनीही विचार व्यक्त केले.
मोपा विमानतळ वरदान नव्‍हे, शाप!
मोपा विमानतळ हे पेडणे तालुक्यातील लोकांसाठी वरदान नसून शाप आहे. या विमानतळामुळे पाण्याचे स्त्रोत बंद झाल्याने पेडणे तालुक्यातील लोकांचे हाल होत आहेत. ज्यांच्‍या जमिनी गेल्‍या आहेत, त्यांना अजून मोबदला मिळालेला नाही, असे पत्रकार किशोर नाईक गावकर यांनी सांगितले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.