Sarmanas Tonca: प्रवासी ताटकळत, वाहनांच्या रांगा, जुन्या बोटी; सारमानस-टोंक फेरीसेवा बेभरवशाची

Sarmanas Tonca Ferryboat

डिचोली: सारमानस-टोंक जलमार्गावरील फेरीसेवा बेभरवशाची बनली असून ही फेरीसेवा सुरळीत करा, अशी मागणी या जलमार्गावरून नियमित वाहतूक करणाऱ्या प्रवासीवर्गाकडून होत आहे. या जलमार्गावर वाहतूक करणाऱ्या दोन्ही फेरीबोटी जुनाट आहेत.

एखादेवेळी दोनपैकी एक जरी फेरीबोट नादुरुस्त झाली, तर प्रवासीवर्गाची मोठी गैरसोय होत आहे. प्रवासी तासन् तास ताटकळत पडतात. दोन्ही बाजूने वाहनांच्या रांगा लागतात. इच्छित स्थळ गाठणेही प्रवाशांना अशक्य होत असते. नोकरी धंद्यानिमित्त सारमानस-टोंक जलमार्गावरून दरदिवशी हजारो प्रवासी ये-जा करीत असतात. मात्र, या जलमार्गावरील फेरीसेवा कोलमडत असल्यामुळे प्रवाशांना बराच मनस्ताप सहन करावा लागत आहे.

सारमानस-टोंक जलमार्गावरून सध्या दोन फेरीबोटी वाहतूक करतात. मात्र, या दोन्ही फेरीबोटी मोडकळीस आल्या आहेत. त्यामुळे या जलमार्गावरील फेरीसेवेत वारंवार व्यत्यय येत असतो. या जलमार्गावर नवीन फेरीबोटी सुरू कराव्यात. या जलमार्गावरील प्रवाशांचा वाढता आकडा लक्षात घेवून आणखी एक फेरीबोट सुरू करावी, अशी प्रवाशांकडून मागणी होत आहे.

तिसऱ्या फेरीबोटीची आवश्यकता

सारमानस-टोंक जलमार्गावर वाहतूक करणाऱ्या दोन्ही फेरीबोटी जुन्या आहेत. त्यामुळे फेरीबोटी नादुरुस्त होण्याचे प्रकार घडत असतात. या जलमार्गावरून ये-जा करणाऱ्या प्रवाशांची संख्या दिवसेंदिवस वाढत आहे. त्यामुळे या जलमार्गावर तिसऱ्या फेरीबोटीची आवश्यकता आहे. तिसरी फेरीबोट सोडावी, तसेच सध्याची फेरीसेवा सुरळीत करावी, अशी मागणी पिळगावचे माजी सरपंच महेश वळवईकर यांनी केली आहे.