Santainez Animal Sterilization Centre: सांतिनेजमधील निर्बिजीकरण केंद्र बंद! निधी मंजूर न झाल्यामुळे 'पीएडब्ल्यूएस' ने घेतला निर्णय

पणजी: महानगरपालिकेच्या सहकार्याने ‘पणजी ॲनिमल वेल्फेअर सोसायटी’ (पीएडब्ल्यूएस) शहरातील भटक्या कुत्र्यांचे निर्बिजीकरणाचे काम करते. या सोसायटीचे काम गेल्या दहा दिवसांपासून बंद आहे. गेल्या वर्षभरापासून सोसायटीच्या खर्चापोटीचे ७० लाख रुपयांचे अनुदान वित्त खात्यातील फाईलमध्ये अडकून पडल्याने सोसायटीला आपला उपक्रम दहा दिवसांपासून बंद ठेवावा लागला आहे.

याविषयी येथील पशुवैद्यकीय अधिकारी डॉ. श्वेता सरदेसाई यांनी सांगितले की, सोसायटीच्या खर्चाची फाईल (१ एप्रिल २०२५ ते ३० मार्च २०२६) महानगरपालिकेने मंजूर केली. त्यानंतर पशुसंवर्धन खात्यानेही तिची पडताळणी करून मंजुरी दिली. तेथून ती फाईल वित्त खात्याकडे गेली असून, आठ दिवस उलटूनही ती पुढे सरकलेली नाही. त्यामुळे वित्त खात्याकडून निधी न मिळाल्याने सोसायटीने भटक्या कुत्र्यांचे निर्बीजीकरणाचे काम बंद ठेवले आहे.

सांतिनेज येथील स्मशानभूमीजवळ ‘पीएडब्ल्यूएस’चे कार्य अनेक वर्षांपासून सुरू आहे. राज्य सरकार सोसायटीच्या खर्चाचा भार उचलते, त्यास महानगरपालिकेचेही सहकार्य मिळते. पणजी शहर आणि परिसरातील भटक्या कुत्र्यांचे निर्बीजीकरण करून त्यांची संख्या कमी करण्याच्या उद्देशाने सोसायटी काम करते. खर्चापोटीची सुमारे ७० लाख रुपयांची रक्कम गोवा सरकारकडून अद्याप जारी न झाल्यामुळे ‘पीएडब्ल्यूएस’ला प्राणी निर्बिजीकरण कार्यक्रम स्थगित करावा लागला आहे.

गेल्या आर्थिक वर्षातील खर्चाची रक्कम अडकली आहे आणि सोसायटीला आर्थिक भार सहन करणे आता शक्य नाही. त्यामुळे हा कार्यक्रम थांबवण्याशिवाय आमच्यासमोर दुसरा कोणताही पर्याय उरलेला नाही. सोसायटीतर्फे वर्षाकाठी साडेतीन हजार कुत्र्यांचे निर्बिजीकरण केले जाते. सर्वोच्च न्यायालयाच्या निर्देशानुसार ही संख्या पाच हजारांपर्यंत नेण्याचा आमचा मानस होता.

- डॉ. श्वेता सरदेसाई

जे लोक किंवा संस्था अत्यंत कठीण आणि ज्याचे फारसे कौतुक होत नाही, असे काम करत आहेत, त्यांना सरकारकडील देयके मिळण्यासाठी वाट पाहताना दिवाळखोरीच्या उंबरठ्यावर ढकलणे, हे कोणत्याही सुसंस्कृत समाजाचे लक्षण ठरू शकत नाही.

– सुरेंद्र फुर्तादो, माजी महापौर, पणजी महानगरपालिका.