Sanquelim Municipal Elections 2023: साखळी निवडणूकीचा प्रचार शेवटच्या टप्प्यात; तुल्‍यबळ लढतीची शक्‍यता

Sanquelim Municipal Elections 2023: साखळी पालिका निवडणुकीच्या जाहीर प्रचाराला एकच दिवस उरला आहे. त्यामुळे सकाळपासूनच उमेदवारांनी मतदारांच्या गाठीभेटीवर भर दिली. काही उमेदवारांच्या गुप्त बैठकाही सुरू असल्याची माहिती समोर आली.

परंतु येथील मतदारांना काय वाटतेय, हे जाणून घेण्याचा प्रयत्न केला, तेव्हा मात्र मतदारांमध्ये खरोखरच ‘भिवपाची गरज'' असल्याचेच अनेकजण खासगीत सांगताना दिसले.

विधानसभा निवडणुकीत ज्यापद्धतीने मतदारांना अनुभव आला, त्यापेक्षा जास्तच अनुभव सध्या मतदारांना येत असल्याचे अनेकांचे म्हणणे आहे.

यावरून साखळी पालिकेची निवडणूक नक्की कोणत्या दिशेने चालली आहे, हे दिसून येते. प्रभाग क्र. १ असो, बाजारपेठ असो वा अगदी शेवटचा प्रभाग असो,

शहरात निवडणुकीचे वातावरण आहे, असे कुठेच वाटत नाही. भाजपच्या पक्ष कार्यालयासमोर लागलेले झेंडे वगळता इतरत्र कोठेही भाजप उमेदवाराच्या प्रभागात त्याची कोणतीही छबी झळकताना दिसत नाही.

त्यामुळे साखळीतील निवडणूक कोणत्या तरी सावटाखाली लढली जातेय की काय? असेच वाटते.

नेहमीप्रमाणे सर्व व्यवहार सुरू दिसतो, दुसऱ्या बाजूला मतदारांच्या गुप्त बैठका घेतल्या जात आहेत. तर काहीजण घरोघर भेटी देण्यावर भर देत आहेत. हा प्रचार शेवटच्या टप्प्यातील असल्याने सर्व काही अत्यंत गुप्ततेत सुरू आहे.

एका मतदाराने सांगितले, ‘भाजपचे उमेदवार अनेक ठिकाणी युवकांचा गट घेऊन प्रचार करतात;

पण तसा विरोधी उमेदवाराचा प्रचार दिसत नाही. कारण विरोधी उमेदवाराबरोबर जो कोणी दिसेल, त्याला थेट काही वेळात फोन येतो, पण त्या फोनवर काय सांगितले जाते ते त्यांनाच माहीत.

कारण त्यानंतर तो त्या उमेदवाराबरोबर दिसण्याचे धाडसच करीत नाही, अशा अनुभवातून तुम्हाला काय दिसतेय ते पहा.‘

विधानसभा निवडणुकीत अगदी कमी मतदानाच्या फरकाने निवडणूक जिंकलेल्या प्रमोद सावंत यांच्यासाठीही निवडणूक प्रतिष्ठेची बनली आहे.