Sanjivani Sugar Factory: संजीवनी कारखान्यासाठी महामार्ग रोखण्याचा प्रयत्न; 200 हून अधिक आंदोलक शेतकरी ताब्यात

Sanjivani Sugar Factory Protestors arrested: संजीवनी सहकारी साखर कारखान्याबाबत विविध मागण्यांच्या पुर्ततेसाठी ऊस उत्पादक शेतकऱ्यांनी आज, सोमवारी दुपारी महामार्ग रोको आंदोलन करण्याचा निर्णय घेतला होता. तत्पुर्वी सकाळी कारखान्याच्या गेटवर ऊस उत्पादकांनी आंदोलन केले होते. तेव्हाच दुपारी महामार्ग रोखण्याचा निर्णय घेण्यात आला होता.

दुपारी आंदोलक महामार्गावर जमू लागल्यानंतर पोलिसांनी वाहतुकीस अडतळा होऊ नये, यास्तव आंदोलन करणाऱ्या आंदोलकांना ताब्यात घेतले. सर्व आंदोलकांना कुळे पोलिस स्टेशनमध्ये आणण्यात आले आहे. सुमारे 200 हून अधिक शेतकऱ्यांचा यात समावेश आहे.

धारबांदोडा येथील संजीवनी साखर कारखाना पूर्ववत सुरू करावा, ऊस शेतीला प्राधान्य द्यावे आमि ऊस उत्पादकांची नुकसान भरपाई वेळेत द्यावी, या मागण्यांसाठी ऊस उत्पादक शेतकऱ्यांनी आज संप पुकारला होता. यावेळी संजीवनी साखर कारखान्याच्या गेटसमोर जमावाने धरणे आंदोलनाला सुरवात केली.

मागण्या मान्य होईपर्यंत आंदोलन थांबवणार नसल्याचा पवित्रा आंदोलक शेतकऱ्यांनी घेतला. इथेनॉल प्रकल्प होणार की नाही हे सरकारने लेखी स्वरूपात दिले पाहिजे, असा इशारा देण्यात आला होता.