Drowning Death: भावासाठी जीवाची बाजी लावूनही बहिणीचा अंत, कुडचडेत शोककळा; समुद्राने हिरावले दोन निष्पाप जीव

मडगाव/केपे: भावाला वाचवण्यासाठी पाण्यात उडी मारणाऱ्या सानिका संजय नाईक (१७) हिलाही अखेर मृत्यूने गाठले. काल बुडालेला श्लोक नाईक (११) या तिच्या लहान भावाचा घटनास्थळीच मृत्यू झाला होता. आज सकाळी गोमेकॉ इस्पितळात उपचार सुरू असताना सानिकानेही अखेरचा श्वास घेतला. या घटनेमुळे कुडचडे येथील नाईक कुटुंबावर दु:खाचा डोंगर कोसळला आहे.

रविवारी सकाळी दक्षिण गोव्यात वीजपुरवठा खंडित झाल्याने उकाड्यापासून दिलासा मिळवण्यासाठी संजय नाईक यांची पत्नी आपली तिन्ही मुले व बहिणीसह खणगिणी-बेतुल येथील समुद्रकिनाऱ्यावर गेली होती.

आंघोळीनंतर दुपारच्या सुमारास श्लोक पुन्हा पाण्यात उतरला. मात्र, अचानक आलेल्या जोरदार लाटेत तो वाहून गेला. हे पाहताच त्याची मोठी बहीण सानिका धावत पाण्यात उतरली. भावाला वाचवण्याचा प्रयत्न करत असतानाच दुसऱ्या प्रचंड लाटेने दोघांनाही आपल्‍या कवेत घेतले.

आईवर दु:खाचा डोंगर

आपल्या डोळ्यादेखत दोन लेकरं गमावल्याने आईला जबरदस्त मानसिक धक्का बसला. त्‍यामुळे तिला रुग्णालयात दाखल करण्यात आले. कुटुंबावर कोसळलेले हे दु:ख संपूर्ण गावाला अस्वस्थ करून गेले आहे.

काल दुपारी अडीच वाजता बहीण-भावाचा मृतदेह घरी आणताच कुटुंबीयांनी एकच हंबरडा फोडला. उपस्थित ग्रामस्थांच्या डोळ्यांतही अश्रू दाटले. संध्याकाळी साडेचार वाजता कुडचडे स्मशानभूमीत अत्यंत शोकाकूल वातावरणात दोघांवर अंत्यसंस्कार करण्यात आले.

दीड वर्षाचा चिमुकला झाला पोरका

संजय नाईक यांना तीन मुले. कालच्‍या दुर्घटनेत श्‍‍लोक व सानिका या आपल्‍या दोन मुलांना नाईक यांनी गमावले. ते एका फार्मसीत कामाला आहेत. त्‍यांना आणखी एक दीड वर्षाचा मुलगा आहे.

१५ मिनिटांचा संघर्ष

घटनास्थळी उपस्थित असलेल्या एका व्यक्तीने गंभीर अवस्‍थेत सानिकाला पाण्‍याबाहेर काढले. तिने धापा टाकत भावाचा उल्लेख करताच शोधमोहीम सुरू झाली. सुमारे १५ मिनिटांनी श्लोकला बाहेर काढून बाळ्ळी प्राथमिक आरोग्य केंद्रात नेण्यात आले. मात्र डॉक्टरांनी त्याला मृत घोषित केले. गंभीर अवस्थेतील सानिकाला गोमेकॉमध्ये हलवण्यात आले होते. पण आज तिचीही प्राणज्‍योत मालवली.