Sanguem: पाण्याची तीव्र टंचाई; नागरिकांंमध्ये उसळली संतापाची लाट

Sanguem: सांगेत गेले तीन दिवस पाणी पाणी करण्याचा प्रसंग नागरिकांवर ओढवला असून पाणी खात्याने कोणतीही पूर्वकल्पना न देता जलवाहिनी दुरुस्तीचे काम हाती घेतल्याने आणीबाणीची परिस्थिती निर्माण झाली होती. परिणाम म्हणून नागरिक पाणी खात्याविरुद्ध तीव्र संताप व्यक्त करू लागले असून अशी मोठी दुरुस्ती करायची असल्यास ग्राहकांना पूर्वकल्पना देणे आवश्यक असल्याची प्रतिक्रिया फोणकुली-कष्टी येथील धीरज हरमलकर यांनी व्यक्त केली आहे.

मोठ्या जलवाहिनीचे दुरुस्ती काम कोटार्ली-सांगे येथे सुरू होते. त्या दिवशी दिवसभर नळ कोरडे पडले. दुसऱ्या दिवशी तीच परिस्थिती होती. वास्तविक पाणी खात्याने नागरिकांना आगाऊ कल्पना देणे आवश्यक होते. नसल्यास पाणीपुरवठा करणारे टँकर गावात फिरविणे गरजेचे होते. प्रशासन नावाची गोष्टच नसल्याची परिस्थिती गेले तीन दिवस सांगेतील जनता अनुभवीत होती, अशी प्रतिक्रिया ऑलीवर फर्नांडिस यांनी व्यक्त केली.

नगरसेवक मेशू डिकॉस्ता म्हणाले की, जलवाहिनी दुरस्ती कार्य हाती घेणार असल्याची ग्राहकांना कल्पना देणे गरजेचे होते आणि वेळीच जलवाहिनी दुरुस्ती झाली नसल्यास पर्यायी व्यवस्था करण्याची जबाबदारी पाणी खात्याची असताना तीन दिवस प्रशासन कोलमडले. अधिकाऱ्यांचे मोबाईल बंद; मग सामान्य जनतेला आमच्यासारख्या नगरसेवकांनी काय उत्तर द्यावे. दरम्यान, मंगळवारी दुपारनंतर पाणीपुरवठा सुरळीत झाल्याचे आढळून आले.