Bhutani Project: 'भूतानी'च्या जागेत झाडांची कापणी! वनखात्याच्या पाहणीत धक्कादायक बाब समोर; कारवाईकडे सर्वांचे लक्ष

Sancoale Bhutani Project Inspection News

वास्को: वन खात्याचे दक्षिण विभागाचे उपवनसंरक्षक संतोष कुमार रेड्डी यांनी सांकवाळ येथील भूतानी प्रकल्पाच्या जागेची बुधवारी (ता.५) पाहणी केली. यासंबंधीचा अहवाल ते आपल्या वरिष्ठांना देणार आहेत.

मंगळवारी (ता.४) वन परिक्षेत्र अधिकाऱ्यांनी पाहणी केली होती. त्यावेळी तेथे विविध जातीची बारा झाडेझुडपे कापली असल्याचे नजरेस आल्याचे रेड्डी यांनी सांगितले.

भूतानी प्रकल्पाच्या परिसरात आग लागल्याप्रकरणी काही स्थानिकांनी २४ फेब्रुवारी रोजी वेर्णा पोलिस स्थानकात तक्रार केली होती. त्यानंतर परमेश कन्स्ट्रक्शनतर्फे संबंधित स्थानिकांविरोधात तक्रार करण्यात आली होती.

मात्र, आता वन खात्याने दखल घेताना आग लागलेल्या भागाची तसेच इतर जागेची पाहणी केली. गेल्या दोन दिवसांमध्ये वन खात्याच्या अधिकारी वर्गाने भूतानी प्रकल्पाच्या जागेतील झाडांची पाहणी केल्याने ग्रामस्थांनी समाधान व्यक्त केले.

बुधवारी त्या जागेची पाहणी करताना संतोष कुमार रेड्डी यांच्यासमावेत माजी मंत्री एलिना साल्ढाणा, पीटर डिसोझा, सुकोरिना मार्किस, पिएदाद वालिस वगैरे होते. सुकोरिना व पियादाद यांची त्या ठिकाणी जागा आहे. मात्र, त्यांना त्या ठिकाणी जाता येत नव्हते. त्यामुळे त्यांच्या जागेतील विविध प्रकारच्या झाडांचे काय झाले, हे त्यांना समजत नव्हते. प्रकल्पाच्या जागेत काही कामगार लहान लहान झाडे कोयत्याच्या साहाय्याने कापत असल्याचे दिसून आले. अधिकाऱ्यांनी त्यांचे काम थांबविले. तसेच त्यांना तेथे काम करू नका, अशी सूचना करण्यात आल्याची माहिती मिळाली आहे.

आम्हाला न्याय मिळण्याची आशा!

सांकवाळचे पंच तुळशीदास नाईक यांनी सर्वोच्च न्यायालयाने ८५५ भूखंडांच्या रूपांतरणास स्थगिती दिल्याबद्दल आनंद व्यक्त केला. ते म्हणाले, थॉमस व आरावजो समितीने उत्तर व दक्षिण गोव्यातील एकूण ८.६४ चौरस किलोमीटर क्षेत्राचे ८५५ भूखंड खासगी वनक्षेत्र म्हणून निश्र्चित केले होते. त्यामध्ये भूतानी प्रकल्पाच्या जागेचा समावेश होता.

गोवा फाउंडेशनने हे प्रकरण सर्वोच्च न्यायालयात नेले होते. त्यासंबंधी सर्वोच्च न्यायालयाने स्थगिती आदेश दिला आहे. आता आम्हाला न्याय मिळण्याची आशा आहे. गोवा फाउंडेशनच्या ‘पर्यावरण बचाव’ अभियानाला आमचा पाठिंबा आहे. बरोबर एक वर्षापूर्वी आम्ही सांकवाळच्या सांकळ्यो देवाला साकडे घातले होते. त्यानंतर आता आम्हाला आनंदाची बातमी मिळाली आहे. तसेच एक झाड कापा, बारा कापा नाहीतर बाराशे कापा, तो गुन्हाच आहे. त्यामुळे वन खाते कोणती कारवाई करते याकडे आमचे लक्ष लागले आहे.