पश्चिम बगल रस्त्याबाबत ग्रामस्थ करणार आंदोलन

सासष्टी : पश्चिम बगल रस्ता व मलनिस्सारण पाइपलाइन संबंधी पेडा, बाणावलीचे नागरिक एकत्र आले. त्यांनी बैठक घेतली व यासंबंधी प्रखर आंदोलन करण्याचा इशारा दिला आहे. स्टिल्टशिवाय पश्र्चिम बगल रस्त्याला आमचा विरोध आहे, हे त्यांनी स्पष्ट केले. तसेच कोलवा (Colva) येथील सांडपाणी प्रक्रिया प्लॅंट ते साळ नदीपर्यंतच्या जमिनीखालील पाईपलाईनलाही आमचा विरोध असल्याचे त्यांनी सांगितले.

या प्रकरणी आम्ही दक्षिण गोवा (South Goa) खासदार फ्रांसिस सार्दिन यांची भेट घेणार असून हे प्रकरण केंद्रापर्यंत पोहोचविण्यासाठी आग्रह करण्यात येणार आहे, असे जिल्हा पंचायत सदस्य हांझेल फर्नांडिस, रॉयला फर्नांडिस व रॉक फर्नांडीस यांनी सांगितले.

खासदार सार्दिन यांनी भेट निश्र्चित केली आहे, असे रॉक फर्नांडिस याने सांगितले. तसेच आमदार वेन्झी व्हिएगश यांनी सुद्धा नागरिकांच्या लढ्याला पाठिंबा दर्शविला असल्याचे हेन्झल फर्नडिस म्हणाले.

पाणी घरांत येईल!

जर पश्चिम बगल रस्ता स्टिल्टवर उभारला नाही, तर पावसाळ्यात येथे पाणी साचेल. हे पाणी (water) जवळच्या घरांमध्ये शिरेल, अशी भिती त्यांनी व्यक्त केली. तसेच जर प्रक्रिया केलेले सांडपाणी साळ नदीत सोडले तर नदी अस्वच्छ होईल. शिवाय नदी परिसरातील शेत जमीन खराब होण्याची शक्यता आहे. जलप्रदूषणामुळे अनेक समस्या निर्माण होतील, त्यासाठी हा प्रश्‍न त्वरित सोडविणे आवश्‍यक आहे, असेही ग्रामस्थांचे मत आहे.